Khawkhêng avangin Zimbabwe-in harsatna a tawk

Africa chhim lama ram, Zimbabwe chuan khawkhêng nasa tak avangin harsatna a tawk mek a, an President Emmerson Mnangagwa chuan ṭanpuina sum USD tld. 2 an mamawh tih a sawi.

Zimbabwe hian khuarel chhiatna an tawh mek avang hian 'state of disaster' an puang a, an ṭhenawm ram Zambia leh Malawi pawhin khawkhêng vang hian harsatna an tawk ve bawk.

Zimbabwe President chuan,"El Nino vangin khawkhêng hi a thleng a, ramchhung hmun za zela 80 velah ruah chu a sur dan pangngai aia tlemin a sur a ni" a ti. El Nino a lo thlen hian eastern Pacific chu a hma aiin a lum belh ṭhin a, hei hian khawvel sik leh sa inthlak danah nghawng a nei ṭhin a ni. India leh Africa khawmualpuiah chuan ruah a sur tlem phah a, khawkhêngin a zui ṭhin bawk avangin harsatna tawk an tam ṭhin hle. El Nino hi kum tin a thleng lo a, kum 2-7 dana thil thleng ṭhin a ni.

Zimbabwe-a loneitute thlai chu khawkhêng vang hian tam tak a khawro tawh a, Africa chhim lamah hian ṭam a tlak mai a hlauhthawnawm hle. President Emmerson chuan an ram mipuite eitur ngaihtuah chu a pawimawh tak zet tih sawiin, mi tu mah rilṭama an thih a phal dawn lo tih a sawi. President chuan UN agency hrang hrangte leh sumdawng liante chu mi chanhai zawkte pui turin a ngen nghal bawk. Zimbabwe-ah hian mi za zel 60 chu thingtlang lama awm niin an ni tin eitur atan anmahni thlai tharte ring ṭhin an ni a, heng mite hi khawkhêng vanga buainain a nghawng nasat ber turte an ni bawk.