Brazil lower house-in President bantirna tur pawm

Brazil Parliament lower house chuan nimin khan an ram President Dilma Rousseff ban tir chungchang ngaihtuahin, ban tir tura duhtu lam an chak. Lower House thutlukna siam hi Senate-ah thawn a ni ang a, Senate hian a lo ngaihtuah ve leh dawn a ni.

Nimina lower house-a vote lakah, President Rousseff-i ban tir duhtu lamah vote 367 a tla a, a duh lo lamah vote 167 a tla bawk, mi pasarih an hai. Legislator 513-te hian a mal te tea vote thlakin, an vote thlak hma hian second 30
ṭheuh thusawina hun pek an ni bawk.

Senate chuan President hi thubuai siamsak a nih dawn leh dawn loh a ngaihtuah dawn a, member tam zawkin an duh chuan Rousseff-i hi ni 180 chhung ngeia a ban a ngai dawn a ni. A ban chuan a kaihhruai ṭangrual sorkar thlawpna hnukdawktu, Brazilian Democratic Movement Party (PMDB) hruaitu, Vice President Michel Temer chu acting president atan lakluh nghal a ni ang.

Lower house-a president chungchang ngaihtuah a nih lai hi national television-ah live-a tihchhuah a ni a, khawpui hrang hrangah President paihthlak duhtu leh dodaltute an pungkhawm a ni.

President Rousseff-i hi kum 2014-a President thlanna neihah a tlin leh theihna atan an ram budget indaihlohnate zepah puh a ni. Eptute chuan President term hnihna hmang mek, Rousseff-i kaihhruaina hnuaiah an ram chuan kum 1930 hnu lama sum lama dinhmun chhe ber an tawng mek niin an sawi. Rorellai, Woker's Party kaihhruai ṭangrual sorkar eirukna nasa thleng mekah President hi mawhphurtuah an puh bawk.