Syria-in Israel PM thusawi sawisel

Israel Prime Minister Benjamin Netanyahu chuan a ṭum khatna atan, Pathianni khan an ram luah, Golan Heights-ah weekly cabinet meeting a ko a, hei hi Syrian activist-te chuan na takin an sawisel nghal.

Golan Heights-a Juda-te chenna, Maaleh Gamla-ah meeting hi buatsaihin, PM Netanyahu chuan, kum 1967 Midde East war laia Israel sipaiten an lak, Golan Heights-a ram 70% chu Israel hnuaiah a awm chhunzawm zel dawn tih a sawi.

Netanyahu chuan, "Golan Heights-a meeting ka kohna chhan chu, Golan hi Israel kutah a awm chhunzawm zel dawn a, engtikah mah Israel hi a inhnukdawk dawn lo tih ka puan duh vang a ni" a ti.

Kum 49 kaltaa Israel-in Golan a lak khan, he hmuna cheng Syria mi 131,000 chu umchhuah an ni tih Goland-based Al-Marshad Arab Human Rights Center chuan tarlang a, heng mite hi Kristian, Muslim leh Druze-te an ni. Israel-in a ram luah chhunga thingtlang khaw parukah chuan Syrian Arab mi 20,000 vel an la khawsa mek a ni. Hetihlai hian Israel sorkarin Juda-te chenna tur in a sakah Juda mi 21,000 vel an khawsak mek bawk a, hengte hi Israel sorkar chuan a humhalh tlat a ni.

Golan Height-a cheng Syria mi tam zawk chuan Israel-in an ram a luah hi an dodal a, Israel-in citizenship pek a tumna pawh hnawlin, state nei lo angin an khawsa mek a ni.

Israel chuan kum 1981 khan Golan Height-a a ram luah chin hi a ram peng pakhatah a chhal tawh a, mahse hei hi ramdangte leh United Nations chuan an pawm lo. Syrian researcher Salman Fakheraldeen chuan Syria rama tualchhung indona thleng mek chu Israel chuan remchangah lo hman a tum niin a puh. Syria tualchhung buaina a thlen hnu hian Israel sorkar hian Golan-ah hian dollar maktaduai tel investment a ti thar a ni.