Allergy neite Pfizer Covid vaccine la lo turin ti

United King medicine regu­­lator, Medicines and Health­care products Regula­tory Agency (MHRA) chuan thuchhuah siamin, Pfizer-BioNTech COVID-19 vaccine chu damdawi leh chaw lama allergy nei nasa, anaphylaxis nei te chuan an la ve thei dawn lo tih a sawi. 

MHRA hotu June Raine chuan tun hma lama vaccine, damdawi leh ei tura allergy lo nei ṭhinte chuan Covid-19 vaccine hi an la thei lo tih sawiin, he vaccine dose khatna an laka allergy  neite pawh a dose hnihna pek chhunzawm an ni dawn lo tih a sawi bawk. 

UK hian Pfizer-BioNTech COVID-19 vaccine hi pawmin a pe chhuak ṭan tawh a, Thawhlehni zing khan a hmasa ber atan kum 90 mi, Margaret Keenan hnenah vaccine hi pek a ni. Mahse vaccine dawng tawh zingah allergy nei an awm nia report an awm avangin, fimkhur thilah MHRA chuan thuchhuah thar hi a siam leh a ni. 

Europe ram zingah UK-ah hian Covid-19 vanga thi an tam ber a, hri kai hmuh chhuah hi mi maktaduai 1.7 chuang an awm tawh. Sorkar chuan vaccine hi mipuite hnena sem turin dose maktaduai 40 a order a, a thawh khatna atan vaccine hi kum 80 chung lam hnenah pek hmasak a ni.  

Pfizer-BioNTech COVID-19 vaccine hi Canada pawhin a pawm ve leh tawh a, enchhinna neih hnuhnung berah 95% in a rintlak niin a sawi. Bahrain pawhin he vaccine hi mipui hman turin phalna a pe tawh a,  US Food and Drug Administration pawhin nimin khan emergency-a hman phal a nih dawn leh dawn loh chungchang a ngaihtuah bawk. 

Spain chuan kum 2022 thleng chu Covid-19 vaccine hralhna leh test neihnaah value-aded tax (VAT) a la dawn lo. 

Finance minister leh sorkar thu­puangtu, Mari Jesus Montero chuan cabinet meeting neih zawh hnua press conference a neihah, Covid-19 vaccine chu a thlawnin pek a ni dawn tih a sawi. Hei hi European Union-in inremna a lo siam tawh zulzuia tih a nih thu a sawi. 

Health minister Salvador Illa chuan nakkum January thla aṭangin vaccine hi pek chhuah ṭan a ni dawn tih sawiin, May thlaah chuan an ram mipui tam zawk chuan vaccine hi an dawn hman beisei a ni tih a sawi a ni. 

Japan chuan coronavirus vaccine dah ṭhatna tur, deep freezer 10,500 lei belh a tum a, hei bakah hian dry ice pawh tam tham tak lei a tum bawk tih ministry of health chuan a tarlang. 

Japan hian an ram mipui, mi makta­duai  145 te tan Pfizer Inc, AstraZeneca Plc leh Moderna Inc hnen aṭangin vaccine dose maktaduai 290 leina turin inremna a lo siampui tawh bawk. 

Pfizer vaccine hi  minus 75 Celsius (minus 103 Fahrenheit) leh Moderna vaccine hi minus 20C-ah dah ṭhat a ngai a ni. 

Russia health official-te chuan an rama Covid-19 vaccine siam, Sputnik V vaccine la te chu an lak hma leh lak hnuah hun eng emaw chen zu in rih lo turin an chah. 

Consumer health watchdog hotu, Anna Popova chuan Sputnik V vaccine lak turte chuan injection an lak hma kar hnih leh, an lak hnuah ni 42 chhung chu zu laka inthliarfihllim turin a chah a ni. 

Sputnik V vaccine enchhina, clinical trial hi la zo fel chiah loh mah se, tunkar chhungin doctor, sipai, zirtirtu leh social worker-te tan a thawh khatna atan pek chhuah ṭan a ni ang. 

Russia hi kum 2003 aṭang khan an zu in zat tlahniam hle mah se, khawvela zu in nasa ber ram zingah a la tel. Zu hian vaccine hnathawh leh, natna do tura taksa chakna a tihhniam theih thu sawiin, Popova hi hri do tura chak taka an awm duh a nih chaun zu in lo turin a chah a ni. 

Hetih lai hian vaccine siamtu, Alexander Gintsburg erawh chuan zu no khat lek chuan engmah harsatna a thlen loh tur thu a sawi ve thung.