Nepal-in Mt Everest teh nan USD mtd 1.1 seng

Nepal sorkar chuan khawvela tlang sang ber, Mt Everest san zawng teh ṭhat nan khan US dollar maktaduai 1.10 a seng. 

Nepal hminga Sagarmatha tia vuah, Mt. Everest san zawng teh ṭhat nan hian kum hnih zet hun hman niin, mi 80 velin hna an thawk tih Department of Survey-a deputy director general Susheel Dangol chuan a sawi. 

Field work chu kum 2018, February thla aṭang khan ṭan ni mah se, Dangol kaihhruai team hian May 22, 2019 aṭang khan Global Navigation Satellite System (GNSS) survey hi an nei ṭan a ni. Gravity Survey leh Triangulation and Trigonometrical levelling pawh neih a ni bawk. 

Everest tlang san zawng dik tak hriat theihna atan hian station hrang 12 aṭangin teh a ni a, hei hi Nepal sorkarin ama hmalaknaa khawvela tlang sang ber a teh vawi khatna a ni. 

Tlang san lam teh zawh a nih hnu hian Nepal team hian Everest hmarlam aṭanga tlang san lam lo teh ve tu,m Chinese survey team nen data siam hna an thawk zui a, hei hi an tihfel vel hnuah Mt Everest tlang san zawng chu meter 8,848.86 a nih thu an puang ta a ni.

Mt Everest hi Nepal-ah chuan Sagarmatha tih a ni a, China-ah chuan Mt Qomolangma tih a nih thung.