Joe Biden-a fapa chhui chiang mek

US President-elect Joe Biden fapa, Hunter Biden chu chhiah a pek dan chungchangah chhui chian mek a ni. 

Kum 50 mi, Hunter Biden hi lawyer a ni a, consulting leh investment firm-te a din bakah, organisation eng emaw zatah board member a ni a, heng zingah hian national railroad corporation Amtrak pawh a tel. 

Chhiah pek chungchangah chhui chian mek a nih thu hi sawi ni mah se, chhui a nihna chhan kimchang erawh puanzar a ni lo. Mahse a sumdawn puite nena chhiah pek tur an bawhchhiat dan te, ram danga sumdawnna a kalpuinaa money laundering law a palzut dante chhui nia sawi a ni. Hemi chungchangah hian mi pahnih chu thu zawhfiah an ni tawh. Hunter Biden pawh hian Delaware-a US Attorney office-in a lawyer-te an biak hnuah chhui chian mek a nih thu hi Thawhlehni khan a hre ve chauh niin a sawi. 

Kum 2019 aṭang khan US president Donald Trump leh Republican lam chuan Hunter hi Ukraine leh China-a sumdawnna a kalpui danah an lo bei fo tawh a ni. Delware repair shop-a a laptop a dahah pawh thil dik tawk lo a awm nia sawi a lo ni tawh a, mahse finfiahna erawh hmuh a ni lo. Kum 2019 December thla khan a laptop hi Federal Bureau of Investigation chuan an man sak niin New York Post chuan a lo tarlang tawh a ni. 

Report ṭhenkhat chuan Hunter Biden hi a pa, Joe Biden-a'n US President thlannaa chuh a tum thu a puan hma daih, kum 2018 aṭang khan chhui chian ṭan a ni tawh niin an tarlang. 

Barack Obama hnuaia Joe Biden vice president a nih lai aṭang khan Hunter Biden hian Ukraine leh China-ah sumdawnna a kalpui tawh a, hemi chungchang hi kumin inthlan dawna campaign-naah Republican lam pawhin beihna atan an lo hmang fo tawh bawk.