Kim-a farnuin South Korea minister sawisel

North Korea ram hotu, Kim Jong-un farnu, Kim Yo Jong chuan South Korea foreign minister-in NKorea ram chu coronavirus laka a fihlim nia sawi chungchang ringhlel a, zawhna a siam chu chhang letin, a thil sawi duh dan chuan ram pahnihte inkarah nghawng ṭha lo tak a siam thei a ni, a ti. 

South Korea foreign minister Kang Kyung-wha chuan North Korea-in an rama Covid-19 kai an awm lo nia a sawi chu awih a har hle tih sawiin, South Korea-in hripui leng mek dona kawnga thawhdun rawtna pawh NKorea lam hian a ngaihsak lo niin a sawi a ni. 

Kim Yo Jong chuan a thusawi hi chhang letin, thu ngaihtuah chiang loa a thusawi hian North leh South Korea ram inkar boruak ṭha lo chu belhchhah zel a duh zia a tilang a ni, a ti. "A thil sawi tum tak hi a chiang hle a ni. A thusawi hi kan theihnghilh tawh ngai dawn lo a, amah pawhin a man a pek a ngai ngei ang," a ti. 

NKorea state media chuan an ramah hri kai hi awm lo mah se, sorkar chuan hri leng laka invenna turin theihtawp a chhuah reng tih an sawi. International border-te kharin, an rama palaite pawh an haw tir a, hei bakah hian symptom nei nia rinhlelh, ramchhung mite pawh inkhung hran tir nghal zel an nih thu a tarlang. 

Insumdawnna tawna a thawhpui ram lian ber, China ram nena an inrina pawh khar a ni a, hei hian NKorea ram economy thleng pawhin a nghawng na hle nia sawia ni. NKorea hian hri len vang te, leilung chhiatna thleng vang leh US hmalaknaa nuclear programme vanga hrekna hrang hrang siamsak an nih avangin harsatna pawh an tawk nasa tih a lo sawi tawh a ni. 

NKorea health care system hi a ṭhat tawk loh em avangin an ramah hripui hi a darh a nih chuan chhiatna lian tham tak an tawk ngei dawn niin expert-te chuan an sawi. Mahse sorkar chuan tun thlengin hri kai hi an awm lo niin a la sawi reng a ni.