Lirnghing tuarte chhawmdawl hna thawk zel

Ecuador leh Japan rama lirnghing tuarte chhanchhuah leh chhawmdawl hna thawh chu chhunzawm zel a ni. Ecuador rama kar kalta Inrinni-a magnitude 7.8-a naa lirnghing vanga thi chu nimin thleng khan mi 413 an tling tawh niin sorkar thuchhuak chuan a tarlang. Lirnghing hian chenna in tam tak a tichhia a, thil a tih≠chhiatte siamṭhatna tur hian dollar tluklehdingawn tel a ngai dawn niin President Rafael Correa chuan a sawi. Lirnghing vanga hliam tuar hi mi 2,500 chuang an awm.

President Correa chuan TV-a thu a sawiah, in chim hnuaia tangte zawn chhunzawm zel an la nih thu sawiin, thi zat pawh an la punchhoh a rin thu a sawi. Ecuador rama lirnghing hi Pedernales khuaiin a tuar nasa ber a, mi 400 vel an thih bakah khaw chhung a sawi chhe nasa hle.

Organizaton of American States chuan an group emergency fund chu Ecuador ram ṭanpuina atan an pe dawn tih a sawi. Finance ministry chuan China Development Bank atangin dollar tluklehdingawn hnih an puk tur thu a sawi bawk.

Japan chhim lamah pawh lir≠nghing tuarte ṭanpui leh chhan≠chhuah hna thawh chhunzawm zel a ni a, lirngingin an in a sawichhiat mi tam tak chu khawvawt tak hnuaiah an car-ah te awmin, mi 100,000 vel chu sorkarin awm lailawkna a siamah an khawsa mek. Chhiatna tawkte chhawmdawl hna hi sipai leh emergency service mi leh sate an thawk a, US sipaiten an pui bawk.

Kar kalta Inrinni khan Japan chhim thlang lama Kyushu thliarkarah magnitude 7.3-a nain lir a nghing a, hemi hma lawk Ningani zan khan magnitude 6.4-a nain a lo nghing tawh bawk. Japan rama lirnghing vang hian mi 44 an thi a, mi 1,000 chuangin hliam an tuar. Vawi za chuang zet afterschock a thleng a, Thawhṭanni tlai khan magnitude 5.8-a nain a sawi leh a ni.

Lirnghing hian kawngpui, lei leh tunnel tam tak a tichhia a, leiminin thingtlang khaw eng emaw zat kalpawh theih lohin a dangchat bawk. Khaw ṭhenkhatah chuan nimin thleng khan electric, tui leh gas supply a la awm lo a, rel service pawh a bahlah phah a ni. Aid agency chuan lirnghing nawn leh hlauhthawn thilah mi 250,000 chu an in chhuahsan turin an hrilh.