Brazil President-in a tawp thlenga beihlet tum

Brazil President Dilma Rousseff-i chuan parliament-a amah ban tuma hmalak mekna chu a tawp thlenga beihlet a tum tih a sawi.

Parliament Lower House, Chamber of Deputies-a President ban tirna tur pawm a nih hnua thu a sawi hmasak berah, Rousseff-i chuan, "Hei hi a tawpna tur a ni lo. Kan bei let zel dawn a ni" a ti. "Ka suangtuahna leh ka diknate chu min rahbehsak a ni mai thei, mahse min paihbo thei lo ang. Democracy chu a dik te lamah a tang tlat zel a ni" a ti.

President ban tir tuma beitute a beihletna chu ama tan chauh a ni lo a,amah vote tu an ram mipui maktaduai 54-te tana a beih letna tur a ni bawk niin Rousseff-i chuan a sawi. Brazil mipuite tan an rama democracy tunnun a nih zel theihna tura an beihna a ni tiin, democracy awm lohnaah chuan economy lamah pawh an ṭhang thei lo a, hna thar siam leh social programme te pawh a awm thei dawn lo a ni, a ti.

Rousseff-i chuan lower house chuan sum lama buaina an tawhah president hlui dangte lakah amah chu en hrangah a puh bawk.

Hetihlai hian eptu lam chuan kum 2014 inthlanah chak leh ngei a duh avangin President Rousseff-i hian an ram budget chungchangah dawt a sawi a, sum dinhmun lan
ṭhat tir a duh avangin bank hnena sum pek turte a tihkhawtlai lui niin an puh thung. Mahse Rousseff-i chuan hetiang thil hi president hlui dangte pawhin an lo ti tawh a, heng mite thitlih hi dankalh emaw, pawikhawih emaw tiin an puhsak lo tih a sawi.

Brazilian Democratic Movement Party (PMDB) hruaitu, Vice President Michel Temer chu amah phiarruah a puh nawn leh. PMDB hian March 29 khan Rousseff-i kaihhruai ṭangrual sor≠kar an thlawpna an hnukdawk a ni. Rousseff-i chuan vice president-in president ṭanglai ngei phiarrua theihtawp a chhuah chu mak a ti hle tih a sawi.

Pathianni khan Chamber of Deputies of President ban tir chungchanga ngaihtuahin vote an la a, bantir duhtu lamah vote 367 tlain, a duh lo lamah vote 146 a tla. Deputies thutlukna siam hi upper house, Senate-ah thawnin, Senate hian a lo ngaihtuah ve leh dawn a ni. Senate-in president thubuai siamsak a remtih chuan ni 180 chhung ngeiin President hi a ban a ngai dawn a ni.