US Senate-in UAE hnena ralthuam hralh tum thlawp
US Senate chuan United Arab Emirates (UAE) hnenah fighter jet leh drone, US dollar tluklehdingawn 23 hu hralh tumna chu a thlawp.
President Donald Trump kaihhruai sorkar chuan November 10 khan General Atomics, Lockheed Martin Corp leh Raytheon Technologies Corps siam ralthuamte hi UAE hnenah hralh phalsak a nih thu a lo hrilh tawh a ni. Ralthuam hralh thum zingah hian khawvela advanced fighter jet ṭha bera sawi, F-35 50 bakah bomb leh ammunition 14,000 chuang a tel a, a hlawma ram pakhat hnena US drone hralh tam ber tur a ni bawk.
US danah chuan ram dang hnena ralthuam hralh tur chungchang hi Congress in a ennawn a, an thlawp lo a nih chuan a lo danna tur resolution an siam chu House of Representative leh Senate-in an pawmpui a ngai a ni.
Democrats lam chuan President Trump sorkarin ralthuam hralh a tumna hi dan an tum tih an sawi. Mahse Trump chuan House lamin dan sak an tum pawhin a veto hmanga paihthlak a tum tih a sawi. President veto hi hnawlsak tur chuan House-a member hmun thuma ṭhena hmun hnihin an thlawp a ngai dawn a ni.
Mahse UAE hnena F-35 leh Reaper drone hralh tumna lo danna tur resolution pahnih siam chu Senate-ah ngaihtuah a nih hnuin, a tlang zo ta lo. Resolution pahnih vote lakah hian a ralthuam hralh tum dan duhtu lamah vote 47 leh 46 a tla a, resolution thlawp lo lam, ralthuam hralh tumna thlawptu lamah vote 49 leh 50 a tla thung. Democrats member zinga pahnih tih loh chuan inremna block hi an thlawp vek a, Republican member zingah pakhatin resolution thlawp lamah a vote ve bawk. Hetih lai hian Demcorats lam chakna, House of Representative-ah chuan resolution thlawptu lam an chak zawk rin a ni thung.