Khawvel pumah Covid-19 kai mi mtd 35 tling tawh

Johns Hopkins University-a Center for Systems Science and Engineering (CSSE) tarlan danin nimin thlenga khawvel puma Covid-19 hri kai tawh chu mi 3,51,57,350 an awm tawh a ni.

Khawvel puma Covid-19 vanga thi hi mi 10,37,075 an awm tawh bawk. US chu Covid-19 hri kai tam berna ram leh he hri vanga thi tam berna a la ni a, US-a hri kai hmuh chhuah tawh chu mi  74,18,107 an tling tawh a, he hri vanga thi mi 2,09,721 an awm tawh bawk. 

France ramah kar liam ta Inrinni khan Covid-19 hri kai thar mi 16,972 an awm a, hei hi ram pum huapa test an neih aṭanga hri kai thar tam ber ni a ni. Hei vang hian an khawpui Paris-a bar zawng zawngte chu vawiin aṭanga khar tir nghal an ni. 

France-a Covid-19 hri kai tawh zawng zawng hi mi 6,19,190 an ni. Heng zinga enkawl dam tawh hi mi 97,778 an ni a, he hri thihpui tawh hi mi 32,230 an awm tawh bawk.   

Paris-a bar zawng zawng khar tir an nih bakah hian inkhuahkhirhna thar hman tur chu sorkar chuan a tichhuak nghal bawk. Nimin aṭang khan Paris leh a chhehvela khaw awm te chu hri leng hluar thei dinhmuna an din avangin fimkhur tura hriattirna chu Prime Minister office-in a tichhuak. Vawiin aṭangin ni 15 chhung atan inkhuahkhirhna hi hman a ni ang.

Europe ram zingah chuan tun hnaiah France-ah hian hri kai an pung chak hle a, a bikin an khawpui Paris-ah hian tualchhunga hri kai thar an tam zual a ni. Sorkar chuan hri leng thawh hnihna a thlen a hlauhthawnawm thu a sawi. Hetih lai hian tualchhung thuneitu ṭhenkhat chuan sorkarin anmahni rawn loa bar a khar tir chu ṭha an ti lo tih an sawi thung.  

Kar kal ta khan Marseille-ah chuan bar, gym leh restaurant chu kar hnih chhung atan khar a lo ni tawh  a, theatre, museum leh cinema-te chu inkhuahkhirhna thar an hman theih hma loh chu khar tir an lo ni tawh bawk. 

Hri kai pung chho leh mah se France sorkar chuan ram pum huapa lockdown puan erawh a thlawp lo  a, mahse hri leng hluarna hmun khawpui  leh bial bila inkhuahkhirhna hman erawh a thlawp thung a ni.

Nimin aṭang khan Czech Republic-ah hri darh tur venna atan kar hnih chhung awh tur emergency puan a ni a, secondary school khar a nih bakah restaurant leh bar-a table pakhatah mi paruk aia tam awm khap a ni.

Europe ram zingah  Spain tih loah chuan kar hnih liam ta chhung khan Czech Republic-ah hian hri kai thar an tam ber a ni. Thi tam berna ram palina an ni bawk.

Spain sorkar chuan an khawpui Madrid leh a chhehvel municipal area-ah lockdawn a la puan chhun­zawm zel. 

Madrid-ah hian Covid-19 hri kai mi nuai khat chuang an awm tawh a ni. Mi paruk aia tam punkhawm khap a ni a, bar leh restaurant-te chu hawn hun siamsak niin zan dar 8 hnu lamah an inhawn khapsak an ni. 

Khawpuia chengte chu ṭul bik thilah chauh khawpui pawna an chhuah phalsak an ni bawk.  Spain-ah hian mi 1,00,000-ah mi 300 dawnin hri kai ang a ni a, Europe ram zingah positive rate sanna ber a ni. 

Italy Ministry of Health chuan Pathianni khan an rama Covid-19 hri kai an pun leh tak avangin, hri laka invenna tur inkaihhruaina thar siam belh leh a tum tih a puang.

Italy chhim lamah hian hri kai thar an pung nasa a, hei hi ngaih­ven a ngai leh tih sorkar chuan a sawi. Inkaihhruaina thar an siam tumah hian khawlaia hmaituamna vuah ngei ngei tur tih te, pungkhawm thei zat chin bithliah siam ṭhat leh te pawh a tel.