Chhawmdawl hna thawktute thah chungchangah Biden-a'n Israel a dem

US President Joe Biden chuan US-in Israel a thlawp leh thlawp loh chu Gaza-a civil mite himna an ngaih pawimawh danah a innghat tih sawiin, World central kitchen group-a chhawmdawl hna thawktu pasarih Israel-in a thah avanga a thinrimna thu leh a tawrhpui thu a sawi bawk.

World central kitchen group-te hi US-a innghat niin, Thawhṭanni khan Gaza-ah chhawmdawlna hna thawk turin an lut a, Israel military an chuanna motor hi kâpin, a hmunah hian thawktu pasarih an thi a ni. He thil thlen hnu hian US president, Joe Biden leh Israel Prime Minister, Benjamin Netanyahu te chu April 4 khan a vawi khat nan inbiain, Biden hian inkahhai puan vat a ṭul thu leh Gaza-a mipuite dinhmun zir chianna neih a ṭul thu a sawi a ni. Biden chuan,"Israel hian indona avanga Gaza-a mipuite tawrhna tiziaawm tur leh hmalak an tum dan chiang taka an puan a ṭul a ni" a ti. US-in Israel laka a rilru put hmang pawh Israel-in mipui himna leh tawrh lohna tur zawnga hma a lak danah a innghat a ni," tiin, hei hi Israel leh Hamas indo hnua Biden-a'n Israel laka thuchhuah a siam nat ber a la ni.

Netanyahu pawhin Gaza strip hmar lama Ashdod leh Erez checkpoint aṭanga lutin, chhawmdawlna thawn luh a remtih thu a sawi ve bawk a, hei erawh tihtawp leh tur a nih thu a sawi thung a ni. Thuchhuah an siama tarlan a nih danin, Israel-in chhawmdawlna thawn luh nana ramri hawn a remtih chhan chu mipuiin harsatna an tawh zel tur ven nan leh, indona chhunzawm a nih a, an thil tumte puitlin thuai theih nan a ṭul niin an sawi.