Pakistan ramri bul Iran-a inkahna thlengah mi 18 an thi

Iran chhimchhak lamah ralthuam hmanga mi hruai botu, firfiak leh sipaite inkapin, mi 18 an thi. Iran state media-in an tarlan danin firfiakte hian civil mi eng emaw zat an hruai bo a, heng mite chhan tur hian sipaite hian an um zui a ni.

Firfiak leh sipaite inkahna hmun hi Iran leh Pakistan inrina bul maia Sistan leh Baluchistan province chhung a ni a, inkahna thlen hma hian firfiakte hian Rask leh Sarbaz bakah, Chahabar-a coast guard awmna khuaa revolutionary guard post-a duty-te an kap niin an sawi. Firfiakte hian civil mi eng emaw zat chu heng hmun aṭang hian tihluihnain an hruai a, firfiak ṭhenkhat hian thihchilh bomb pai kawr an ha bawk nia tarlan a ni. Inkahna avanga thi zingah hian sipai lam aṭangin mi 10 an tel a, revolutionary guard paruk bakah police pahnih leh coast guard pahnih telin, hliam tuar hi mi 10 an awm bawk. Firfiak pawl lam hi mi 8 an kap hlum bawk niin sipaite hian an sawi.

Civil mi hruai bo a, sipaite beitu firfiakte hi tute nge an nih hriat an ni lo a, media lam chuan Jaish al-Adl pawl chu pawikhawihtu nia an hriat thu an sawi thung. Jaish al-Adl firfiak pawlte hi Baluch-a hnam tlem zawkte tana chanvo tam zawk pek duha beitute an ni. Hetih lai hian thuneitute chuan sipai beitu zinga tel nia hriat mi pahnih an man thu an sawi ve bawk.