Lockdown puang turin Ireland sorkarah rawtna thlen

Covid-19 hri leng thawh hnihna thlen hlauhthawn vangin Ireland health chief chuan Pathianni khan ram pumah lockdown puang turin sorkarah rawtna a thlen.

Ireland National Public Health Emer­gency Team chuan an rama hri leng chuan ziaawm lam pan mai loin, hri kai an pun chhoh leh tak avangin, sorkarin inkhuahkhirhna level an hman mek chu tisang a, level 5-a kai chhoh tir turin an ngen. Tunah hian Ireland-a county 26-ah level 2 hman a ni a, Dublin leh Donegal khuaah te chuan level 3 hman a ni mek bawk.

Lockdown hi an puang dawn em tih thuchiang engmah a la awm lo a, mahse ram pum huapa sorkarin lockdown a puang leh a nih chuan an ram economy leh khawtlangah a chhe zawnga nghawng a neih theih avangin sorkar thu an la nghak mek a ni. Hemi chungchangah hian nimin khan an prime minister Micheal Martin leh a thawhpui te chuan meeting an nei a, cabinet meeting neih turah lockdown puan rawtna hi an ngaihtuah tel nghal a ni. 

Inkhuahkhirhna level 5-ah hian mipui te chu ina awm tura tih an ni a, exercise la turin kilometre 5 aia thui kal khap a ni. Mamawh chak khai zuar retailer-te chu an inhawn phalsak an ni a, a hmaa lockdown an puan ang niloin school leh crèche (nau awmna school) te chu hawng tura tih a ni thung. 

July thla tawp lam aṭang khan Ireland-ah hian hri kai thar an pungchho leh hret hret a, kar liam ta Inrinni khan hri kai thar mi 354 an awm leh a, hei hi April thla hnua ni khata hri kai thar tam ber ni a ni.