Israel-Hamas war : Hamas-ten' Israel sipai 4 kap hlum

Gaza Strip-a Israel leh Palestinian firfiak pawl, Hamas-te indona chuan thla ruk a awh tawh a, inkahhai puan a nih theihna turin inbiakna ṭum eng emaw zat neih ni tawh mah se, inremna an la siam thei lo a, indona boruak pawhin ziaawm lam a la pan thei lo.

Inrinni khan Gaza Strip hmar lam, Khan Younis-ah Hamas fighter-te chuan leiverh aṭangin Israel sipaite an kâp chiam a, Israel sipai pali an thi. Israel sipaite hian helai hmun hi an en fiah laiin, Hamas firfiakte'n leiverh aṭang hian sipaite hi an rawn kâp a ni. A hmunah sipai pathum an thi nghal a, a hnuah sipai hliam tuar pakhat chu damdawi inah a thi leh bawk.

Israel sipaite kâptu, firfiakte hi khur-a chhuahna an siam aṭangin an tlanchhe hman a, an awmnaah hian puak thei thilte an kam zui avangin Israel sipaite hian an um zui thei lo a ni.

Israel Defence Force (IDF) chuan nimin zing khan sipaite thite hming leh nihnate a puangzar. Sipai thite hi Oz Brigade-a mi niin Capt. Ido Baruch ( 21), Sgt. Amitai Even Shoshan (20), Sgt. Reef Harush (20) leh Sgt. Ilai Zair ( 20) te an ni. Nikum October 7 aṭanga Israel-Hamas indona a thlen aṭangin, Israel sipai 600-in nunna an chan tawh a ni.

Hezbollah-in Israel drone kap thla

Lebanon helpawl, Iran sorkarin a thlawp, Hezbollah chuan Inrinni khan an ram chhim lam boruaka Israel drone pakhat thlawk chu surface-to-air missile hmangin a kap thla.

Hezbollah hian Lebanon ram boruak chungah Elit Hemers 450 UAV an kah thlak thu an sawi hnuah, Israel pawhin an drone pakhat kah thlaksak an ni tih a rawn nemnghet ve leh a ni. Elbit Hermes 450 UAV hi sipai lam chuan Zik tiin an sawi a, airforce lamin surveillance leh attack drone atan an hmang ṭhin a ni.

Kumin February thla khan Hezbollah chuan Hermer 450 a lo kah thlaksak tawh bawk a, hei vang hian IDF chuan Lebanon ram laili laiah beihpui an thlak zui phah a ni. Israel sipaite chuan Inrinni khan Lebanon chhim lam, Ayta ash-Shab, Arnoun leh Tayr Harfa-a Hezbollah-ho hmunah airstrike an neih thu an sawi a, heng hmun aṭang hian Iran thlawp helpawlho hian Israel beihna atan rocket an kap chhuak reng niin an sawi.