Slovakia President atan Pellegrini thlang tling

Slovakia President thlanna neih zawh takah, left sorkar candidate, Russia thlawptu lam Peter Pellegrini chu thlan tlin a ni. Slovakia hmeichhe president ni thei hmasa ber, Zuzana Caputová a thlak ang.

Parliament speaker ni lai, Pellegrini hian vote tla aṭangin 53.26% a hmu, a khingpui, foreign minister hlui Ivan Korcok chuan 46.73% a hmu.

Kum 48 mi, Pellegrini hi Russia thlawptu, prime minister Robert Fico deputy hlui a ni, kum 2018 khan prime minister a lo ni tawh a ni. President atana thlan tlin a nih ve leh tak avangin, Fico leh a thawhpuite chuan Slovakia Parliament, sorkar leh President office thlengin an thunun thei dawn ta a ni. Fico hian Russia-Ukraine indona thleng mekah, khawthlang ramte'n Ukraine sipaite ṭanpuina an pek ṭhin chu titawp turin a lo nawr fo tawh a ni. Khawthlang ramin Russia President Vladimir Putin chu an puh chhe lutuk nia sawiin, NATO-a Ukraine ram telh chu Indopui III-na bul ṭanna a ni zawk tiin a sawi.