New Zealand-a ram kang vangin chenna in tam tak chhia

New Zealand-ah Pathianni zing aṭanga ram kang vangin chenna in ṭhahnem tak chu a kang chhe tawh a, mi 100 chuangin an awmna hmun an chhuahsan.

New Zealand fire emergency agency chuan nimin khan ram kang hian ram hectare 4,600 (acre 11,366) a tihchhiat tawh thu sawiin, he ram kang vang hian mi 100 chuangin hmun him lam panin an chenna in an chhuahsan tawh tih a tarlang. 

Pathianni zing khan tlang lam aṭangin ram kang hi a inṭan nia sawi a ni a, thli chak tak a tleh tel avangin a kang kai chak hle a ni. New Zealand chhim lama awm, khualzinte fuan khawmna hmun, Lake Ohau khua pawh a kang kai tel. Lake Ohau-ah hian in 60-70 vel a kang chhia niin Radio New Zealand chuan a tarlang a, thuneitute chuan he kangmei chhuakah hian mihring thi leh hliam an awm lo tih an sawi. 

Thli thawt nasat avangin ram kang hi ṭhelh hleih theih a nih loh thu Fire and Emergency chuan a tarlang a, vawiin hian ram kang 50% chu thunun theih an inbeisei thu an sawi. New Zealand chhim lamah hian ram kang a thleng fo a, Lake Ohau hmun erawh a kang kai ngai lo hle thung.