Africa-ah Covid-19 hri kai mi mtd 1.5 chuang tawh

World Health Organisation tarlan danin Africa-a ram 54-a Covid-19 hri kai tawh zawng zawng chu mi 15,22,928 an tling tawh a, hri thihpui hi mi  36,569 an awm tawh bawk. 

Africa ram zingah hian South Africa-ah hri kai hi an tam ber a, mi 6,81,289 in Covid-19 an kai tih hmuh chhuah a ni tawh a,  he hri vang thi awm zat hi mi 16,976 an tling tawh.

North Africa ram zingah chuan Egypt ram chu hri kai tam berna a ni a, mi 1,03,575 in hri an kai tawh a, he hri thihpui hi mi 5,981 an awm tawh a ni. Africa ram zinga mihring cheng tam berna ram, Nigeria-a Covid-19 hri kai hmuh tawh chu mi 59,345 niin, an zinga mi 1,113 in an thihpui tawh a ni. 

Africa khawmualah hian hri hi a lut a nih chuan a pung chak hle dawn niin mi tam takin an ngai a, mahse ram hrang hrangah hri hi darh mah se a kai erawh an pung chak lem lo.