Hospital pawnah kal chhuah vangin President Trump-a'n sawisel a tawk

Covid-19 a kai avanga sipai damdawi-in, Walter Reed Medical Centre-a enkawl mek, US president Donald Trump chu Pathianni khan hospital pawn lamah rei vak lo motorin a tlankual a, pawn lama amah duhsak leh thlawptute chu a enkual. Mahse a thiltih avang hian President hian sawisel a tawk zui. 

President Trump hi kar liam ta Zirtawpni aṭang khan damdawi-inah hian enkawl a ni. A dinhmun tak hi sawichian a ni lo a, White House chuan mild symptoms a nei niin a sawi a, mahse damdawi-ina enkawl a nih hnu hian a oxygen level a tlakhniam avangin extra oxygen pawh pek a ni a, hei bakak hian damlo na zualte enkawlna atana hman, steroid dexamethason pawh pek a ni bawk niin expert-te chuan a sawi. 

Pathiannia hospital pawna a chhuah lai hian mask vuah mah se, motor chhunga awm ve dang, Secret Service staff tan chuan a him lo nia sawi a ni. Hei bakah health lam thuneituten inkhung hrang tura an thurawn pawh a bawhchhia niin an sawi. Hetih lai hian White House thupuangtu Judd Deere chuan medical team lamin a him tawk tia phalna an pek a nih thu a sawi thung.