Armenia-Azerbaijan sipaite inbei leh

Eurore chhimchhak ram pahnih, Armenia leh Azerbaijan sipaite chu Pathianni khan Nagorno-Karabakh inchuhin an inbei leh. 

Azerbaijan official-ten an rama khawpui lian pahnihna, Ganja chu Armenia sipaiten an bei tih sawiin, missile  hmangin mihring chenna hmunte an kap a, in eng emaw zat an kapchhia tih sawiin, thlalakte pawh twitter lamah an tilang a ni. Hetih lai hian an thlalak tihchhuahte hi a dik ngei em tih finfiahna erawh a awm lo thung. 

Armenia defence ministry chuan an ram chhung aṭangin Azerbaijan beihna tur eng mah kahchhuah a ni lo tih a sawi a, mahse Nagorno-Karabakh leader Arayik Harutyunyan chuan Facebook-ah rocket hmanga Ganja kahna tur thupek a tichhuak tih a sawi thung. Harutyunyan thupuangtu Vahram Pogshoyan chuan Ganja-a military airport an kahchhiat sak tih a sawi a, mahse hei hi Azerbaijan official-te chuan a dik lo tih an sawi ve leh thung. 

Armenian official-te chuan Azerbaijan sipaite chu Nagorno-Karabakh khawpui Stepanakert bei a, civil mite bitumah an puh let ve bawk. Nagorno-Karabakh official-te chuan Azerbaijan sipaite beihna avang hian infrastructure eng emaw zat chhiain, mi 200 dawn an thi tawh niin an sawi. 

Nagorno-Karabakh chung chang avanga ram pahnihte inkar buaina hi kum zabi 20 ṭantirh aṭanga inṭan tawh a ni. Tuna an  buaina tak erawh chu kum 1988 aṭanga an ṭan thar leh a ni. Karabakh Armenian-te'n Karabakh chu Soviet Azerbaijan aṭanga Soviet Armenia-a sawn an phut vangin buaina a chhuak a, indona pawh a chhuah phah hial.  Kum 1994-ah ram pahnihte hian inkahhai an puang a, buaina lian tham chhuak loa hun rei tak an awm hnuah kum 2016 April thla khan ni li chhung an indo leh a, mi tam takin an thih phah a ni. Hemi hnu aṭang hian ram pahnihte inkarah buaina hi a chhuak leh fo a, July thla khan an inbeihna avangin mi 20 velin an thi a, September 27 khan buaina chhuak lehin mi 100 chuang an thi leh bawk. 

Ram pahnihte inchuh, Na­gor­no-Karabakh bial hi Azerbai­jan ram chinah a awm a, mahse tualchhunga Armenian pawl, Armenia sorkarin a thlawpten ro an rel thung a ni. Pathiannia Armenia sipaiten an beih nia sawi, Ganja hi Nagorno-Kara­bakh khawpui Stepanakert aṭanga km 100 vel chauha hlaa awm a ni.