NKorea-in enthlatua puh kum 10 tang turin hrem

North Korea chuan an ram enthlatua puh, US mi an man chu hna rim tak thawka kum 10 tang turin a chungthu a rel.

South Korea-a piang, US citizen Kim Dong-chul chu nikum October thla khan North Korea-ah man a ni. Thla hmasa khan Pyongyang-a reporter-te hmaah inpuangin, South Korean intelligence officer-ten sum an pe niin a sawi.

US chuan inbiakna neihpui tura nawrna atan NKorea chuan an ram mi leh sate a man phah ṭhin niin a puh a, mahse hei hi NKorea chuan a pha thung.

March thla khan US zirlai, Otto Frederick Warmbier chu a thlenna hotel-a NKorea chhinchhiahna chuanna thil rua puhin kum 15 tang turin hrem a lo ni tawh bawk.

NKorea chuan kum 62 mi, Kim Dong-chul hian USB stick a kawlah an ram sipai leh nuclear thurukte a lo dah niin an sawi a, nikum October thla khan Rason special economic zone-ah an man a ni.

Virginia-a cheng ṭhin, Kim hian US intelligence officer-ten South Korean spy-te an hmelhriattir niin a inpuannaah hian a sawi. Hetihlai hian NKorea hian an mi mante hi an inpuan luihtir ṭhin avangin, Kim thusawi pawh hi an duhdan anga an sawitir nge, thudik tih hriatthiam a har hle.

Kim leh Warmbier-te bakah hian ramdang mi tang eng emaw zat an awm. Nikum December thla khan Canadian Kristian apstor, Hyeon Soo Lom chu an ram duh loh zawnga thiltiah puhin dam chhung tang tura hrem a ni a, American aid worker Sandra Suh pawh kum 2015, April thla North sawiselna thu tichhuaka puhin man a ni a, an thawn haw nghal bawk.

Kum 2014 September thla khan Mathew Todd Miller chu kum ruk tang tura hrem a ni a, mahse hemi kum vek November thlaah chhuah leh a ni. Kenneth Bae chu kum 2012 Novemmber thla khan NKorea sorkar paihthlak tuma hma laah puhin man a ni a, kum 15 tang tura hrem a nih hnuin Miller rual hian chhuah a ni ve leh a ni.