UN hotuin EU refugee policy a sawisel

United Nations Secretary General, Ban Ki-moon chuan European Union-in Europe rama raltlan leh pem luh tumte khuahkhirhna dan khauh zawk an siam chu a dem thu a sawi.

Austria Parliament-a thua sawiah, Ban Ki-moon chuan raltlan lu tumte khuahkhirh a nih chuan EU member ramten international duty thlengin a nghawng thei dawn a ni, a ti. UN hotuin thu a sawi hma ni hian Austria parliamet chuan an rama pem luh tumte khuahkhirhna dan khauh zawk an siam chu an lo pass a ni.

Raltlan tam tak, a bikin Syria aṭanga lutte an pung chak lutuk chu EU member-te tan buaipui tham an tling tawh a ni. Nikum chhung khan Europe-ah hian raltlan maktaduai khat chuang an lut a, hei hi Indopui II-na hnua raltlan an tam ber ṭum a ni. EU ram zingah raltlante buaipui leh dawnsawn dan chungchang ngaihdan a siam phah a ni.

Austria hian an rama pemluh tumte khuahkhirhna dan khauh zawk a siam bakah, ramri hung a tum bawk. Hemi hma hian Hungary, Slovenia leh Bulgaria-te chuan ramri hung an tum thu an lo sawi tawh bawk a ni.