Germany-ah US-EU inremna siam tum duh loin kawng zawh

US leh EU ramten insumdawnna tura inremna thuthlung, Transatlantic Trade and Investment Partnership (TTIP) deal siam an tum duh loin Germany rama Hannover khawpuiah mi tam takin kawng an zawh.

TTIP inremna siam turah hian US leh EU ramte inkara insumdawnnaah hian tariff tihtawp tum a nih bakah sumdawnna lama daidanna te siam tum a ni. Hei hi mipuite chuan duh loin, inremna hi siam anih chuan hnathawkte hlawh thlenga a nghawng dawn bakah, environmental protection leh labour rights pawh a chhiat phah dawn a ni, an ti.

Lungawi lohna lantira kawngzawh hi boruak ṭha tak hnuaiah neih a ni a, police-te chuan kawngzawhnaah tel hi mi 30,000 vel an tling niin an sawi. An zinga tam tak chuan TTIP titawp tura an duhna thu ziakte an keng lang a ni.

Hetihlai hian US President Barack Obama chuan TTIP siam tum chu EU leh US ram tana thil ṭha tak a ni dawn tih sawiin, hna thar tam tak siam a nih phah dawn a ni, a ti.