Russia rama tuilianin chenna in 10,000 chuang a chîm tawh

Russia ram Ural tlang dunga khawpui pahnih chu tuikhuah chhia leh khaw lum avanga vur tui mekin tuilian a siam chuan a chîm a, chenna in 10,000 chuang a chîm tawh a, tuilian tuarte chhanchhuah hna hi thawh mek a ni.

Ural Mountains leh Siberia bakah, an ṭhenawm Kazakhstan chuan kum tam tak chhunga tuilen nasat ber an tuar mek a ni. Vur tlang tui avangin Ural lui tui hi metre eng emaw zatin a sân phah tawh a, kar liam ta Zirtawpni khan tui khuahna, dam chu chhiain Orsk khua chu tuiin a chîm a ni. Mi nuai 2.3 vel chenna, Orsk khua aṭang hian tuilian tuartu mi 4,000 vel chu sawn chhuah an ni tawh a, lawng leh canoe hmangin hruai chhuah an ni. Orsk khua hi Russia khawpui, Moscow khawchhak lam km 1,800 a hlaa awm a ni.

Russia president Vladimir Putin chuan emergencies minister Alexander Kurenkov chu tuilenna bial tlawh tur hian a hriattir tawh a, governor-te pawh thil thlen dante zawt chiangin a be tawh bawk. Emergencies Minister chuan tuilian tuarte tan tui thianghlim in tur leh, mobile treatment plants an mamawh tih a sawi a, local health official-te chuan tuilenna bialah hian Hepatitis A vaccine an pe mek tih an sawi bawk.

Orenburg region governor, Denis Pasler chuan record a awm chinah an bialin tuilian an tawrh nasat ber ṭum a nih thu a sawi. Orenburg region-a luang tlang, Kazakhstan kaltlanga Caspian Sea-a luang lut, Ural lui chu a tluanin a lian niin a sawi. Region thuneitute chuan tuilianin thil a tihchhiat hi an ram pawisa roubles tld 21 (USD mtd 227) hu vel a tling tawh niin an sawi a, tuilian hi April 20 hma chuan a ziaawm dawn lo niin an tarlang a, hei vang hian khawpuia cheng midangte pawh sawn chhuah belh an la ngai maithei niin an tarlang.

Orsk dam chhia hi kum 2010-a siam niin, Ural luia tui meter 5.5 (meter 18) thlenga sang dawl thei tura siam a ni. Mahse tun ṭuma tui lian hian metre 9 a thleng pha nia sawi a ni. Hetih lai hian Prosecutor-te chuan tuikhuah a chhiat chhan hi a enkawl zuina a ṭhat tawk loh vang niin an sawi a, hei vang hian federal investigator-te chuan safety rules ngaihthah chungchangah tuikhuah siamtu leh enkawltute lakah criminal case an ziak lut nghal a ni.

Tuilian hi Russia ṭhenawm, Kazakhstan pawhin a tuar nasa hle a, president Kassym-Jomart Tokayev chuan kum 80 chhunga an ramin khuarel chhiatna an tawrh rapthlak ber zinga mi a nih thu a sawi.