Brazil judge-in Elon Musk chhui chianna tur thubuai a hawng

Brazil supreme court judge, Alexandre de Moraes chuan X-a account ṭhenkhat block tur thu a chhuah hnuah Elon Musk-a'n account block-te a phelh leh vek tur thu a sawi a, hei vang hian supreme court judge hian Elon Musk chhui zui a nihna tur thubuai a hawng.

Justice Alexandre de Moraes hian Brazil president hlui, Jair Bolsonaro sorkar hun laia digital media hmanga thu dik lo leh inhuatna lam hawi zawnga thu ziah theh darh awmte chhui chianna a kalpui mek a, Bolsonaro-a'n sorkar lai paih thla tura ruahmanna a neih chungchang chhui chianna a nei mek bawk a ni. Heng thubuai kaihhnawihah hian Moraes hian X-ah hian account ṭhenkhat block-na thupek hi a chhuah ta a ni. Hetih lai hian Musk hian mihringin a duhzawng sawi tura zalenna a neih chu a pawimawh ber thu sawiin, Justice Moraes-a'n account ṭhenkhat block tura thupek a chhuah tawh pawh chu constitution kalh a nih avanga amah ngeiin account block-te chu a hlih leh vek tur thu te, X chuan court thupek chhuah tawh zawng zawng pawh a zawm loh tur thu a sawi ve thung a ni.

Hei vang hian Justice Moraes hian thubuai an chhui mek, thu dik lo theh darh kaihhnawihah hian Musk hi hnuk lutin, dan rorelna dodalah a puh a, Musk-a lakah hian thubuai a hawng zui ta a ni. Court thuchhuaha tarlan a nih danin, Justice Moraes hian X-in court thupek a zawm lo a nih chuan, ni tin USD 19,740 an chawi a ngai dawn a ni.