AUKUS-ah ram dang tel belh turin an rel

AUKUS member ram pathum US, Britain leh Australia chuan an pawla Japan tel belh a nih theih nan sawihona an nei dawn.

Indo-Pacific-a China huhâng lian zel leh ṭhang chho zel beih let nana kum 2021-a din, AUKUS hian an inremna hmasa, 'Pillar I' an tihah US leh Britain chuan Australia chu nuclear pai tel thei submarine pek an remti a ni. China chuan AUKUS hi a ngaimawh nghal hle a, an inremna siamte hi thil hlauhawm tak leh, helai biala ralthuam neih tam lama inelna siam theitu a ni thei tiin a sawi.

'Pillar II' an tih, an thawhho lehna tur atan quantum computing, undersea, hypersonic, AI leh cyber technology-a an hmalak zel dan tur ram pathum defence minister-te hian an sawiho leh dawn a, hemi rual hian Japan telh a nih ve theih nan sawihona an neih nghal rin a ni bawk.

US president Joe Biden chuan Asia lama US ṭhian ṭha, Japan leh Philippines nena thawhhona ṭha zawk an neih theih nan ṭan a la mek a, anni ram hi China nena innek reng leh ram inchuha buai reng ram an ni. Naktuk hian US President Biden leh Japanese Prime Minister Fumio Kishida chu Washinghton-ah an inbe dawn a, he hunah hian AUKUS a Japan telh chungchang pawh hi an sawi dun ngei a rinawm.