Rafah beih hun tur an ruat tawh tih Netanyahu-a'n a sawi

Israel Prime Minister, Benjamin Netanyahu chuan Israel-in Gaza chhim lama awm, Rafah khua a beih hun tur chu an ruat tawh niin a sawi. Hebrai ṭawnga video thuchhuah a siamah, Netanyahu hian Rafah beih an tumna chu kaltlangpui an tum thu hi sawiin, indonaa hnehna an chan theih nan Rafah beih chu a ṭul a ni, a ti.

Israel leh Hamas te hi nikum October thla aṭang khan an indo ṭan a, indona chhuah hnuah inkahhai puang tura nawrna awm rengin, tunah hian Egypt sorkar hmalaknain inkahhai puang turin inbiakna neih mek a ni. Hetih lai hian PM Netanyahu hian Hamas-te awmna hmunpui nia an sawi, Rafah beih an tumna kaltlangpui an tum thu hi a sawi a ni. Netanyahu hian Rafah bei tura a ni an ruat fel tawh thu hi sawi mah se, a hun an ruat tak hi a sawi lang lo thung a,"Rafah hi kan bei ngei dawn a, beih hun tur pawh ruat fel a ni tawh," tiin a tarlang.

Israel-in Rafah beih a tumna hi ram tam takin an dodal thu leh kaltlangpui lo tura an duh thu an sawi tawh a, Israel ṭhian ṭha US pawhin a thlawp loh thu a sawi ve bawk. Rafah-ah hian Palestinian maktaduai khat chuang an la cheng nia hriat a ni a, Israel-in Rafah a beih chuan heng mihring chengte himna hi a derthawng dawn a ni. Israel official pakhat chuan Rafah-a cheng Palestinian mipuite sawn chhuah nan hian Israel chuan puan in sing li chuang a lei tawh thu a sawi thung.

Hamas thupuangtu, Sami Abu Zahry chuan Netanyahu-a thuchhuah siam chuan inkahhai puang tura inbiakna an neih mek pawh a nghawng theih thu sawiin, "Inbiakna hlawhtling nei tur chuan inbeihna a tawp a ngai a ni. Kan duh chu a chiang a, kan mi leh sate beihna hi tawp se kan duh ber," a ti. Israel hian Palestine lamin inkahhai puang a, inremna siam tura rawtna an neih hrang hrangte a la hnawl vek a, Palestine hian an mi leh sa sang chuang chu Gaza hmar lama an kal theih nan leh, Gaza Strip aṭanga Israel sipaite inhnukdawk turin rawtna an siam a ni.