Ramadan hmannaa thil ei bangte lei ṭha siam nan an hmang

Malaysia-ah chuan Muslim thla serh, Ramadan laia chaw eibang tam tak paih ṭhin chu ṭangkai zawka hman a ni.

Sorkar hmalaknain Malaysia chhunga state hrang hrang-ah an chaw eibang aṭanga leiṭha siam chhuahna khawl chu kawtthlerah hun a ni. Heng khawlah hian chaw eibangte chu dah luh niin, favai leh phuai nen thil eibangte chu khawl chuan darkar 48 chhung chawh pawlhin leiṭha a lo chhuak ta a ni. Pahang state chuan Ramadan laia eitur bang tam lutuk ṭhin chinfel nan an hmang a, Muslim hunpui lai chuan eitur ningnawi hi tam tak a awm ṭhin a ni. Khawpui chhunga hmun lun lai leh ei leh in siamna bulah leiṭha siamna khawlte hi dah an ni.

Solid Waste and Public Cleansing Management Corporation director, Sharudin Hamid chuan an khawl neihte chuan ni khat chhungin eitur bang kg 25 leiṭhaah a chantir hman tih sawiin nikum aṭanga enchhinna kalpui tawh a ni, a ti. Sharudin chuan rampum huapa ngaihtuah chuan thil te tham tak ni mah se mipuiteah chaw ngaihhlutna a tuh thung nia an hriat thu a sawi. He hmalaknain a tum ber chu thil eibangte bawlhhlawh paihna hmuna paih mai loa ṭangkai taka hman a nih thu a sawi.

Chaw nawi aṭanga leiṭha an siam chhuahte hi loneituten an hman turin pek chhuak leh a ni a, khawl hmanga leiṭha siamte hi chemical tello a nih avangin organic fertilizers huangah a dah theih a ni.