KNU leh PDF-te'n Thailand ramri bula khaw pakhat an la

Karen National Union (KNU) chuan an hnuaia ralthuam nena che pawl, Karen National Liberation Army leh sipai sorkarna duh loa hel, People's Defence Force (PDF) te ṭangkawp chuan Myawaddy khua, Thailand ramria awm chu sipaite kut aṭanga an lak thu an puang.

He thu hi Thailand-a chanchinthar la khawmtuten an ramah Myanmar mi 600 bakah, sipai officer 67 leh sipai pangngai 410 chuang, an chhungte nena an rama luh tum an awm thu leh, Myanmar sipai sorkarin Thailand-a thlawhtheihna ṭum phalna a dil thu hriat a nih thu an sawi hnuah an puang a ni.

Myawaddy hi Thailand-a Mae Sot khua nena inri a ni a, Myanmar leh Thailand insumdawn tawnna kalkawng pawimawh tak a ni. KNU leh PDF te hian Myawaddy hi an bei a, sipaite hian he khua hi an tlanchhiatsan ta nia hriat a ni. KNU hian Myawaddy lak a nih thu an puan hnu hian sipaite ralthuam leh hmanraw hrang hrang an mansakte thlalak an theh darh nghal bawk.

February 2021 khan Myanmar-a Aung San Suu-Kyi kaihhruai democracy sorkar paih thlain Min Aung Hlaing kaihhruai sipai sorkar din a ni a, hemi hnu hian sipai sorkar duh lohna avangin mipui nawrhna a thleng a, ram chhung buainain a chhunzawm a ni. Ram chhung buaina hi eng emaw chenah ziaawm chho tawh mah se, sipai sorkar titawp tur hian ralthuam nena sipaite bei ṭhin pawl hrang hrang an awm reng a ni.

Nikum October thla khan Shan hmar lam leh Rakhine thlang lamah hnam sipai pawl pathum thawkho chuan sipai sorkar lakah hian beihpui lo thlak tawhin, sipai hmun eng emaw zat an la tawh a, kar hmasa khan civil sorkar paihthlak taka hruaitu intel khawmin an din, National Unity Government (NUG) chuan an sipaite'n drone hmanga sipai sorkarin khawpui an siam, Naypyidaw an beih thu an sawi lang bawk.