Biden-a'n Netanyahu-a hmalak dan a pawmpui lo tih sawi

US president Joe Biden chuan Gaza Strip-a Israel prime minister Benjamin Netanyahu hmalak dan chu a pawmpui ve lo tih a sawi.

US Spanish language TV network, Univision-in President Biden interview-na a tihchhuahah, Biden chuan Israel PM chungchang hi sawiin, 'A thiltih dan hi a dik lo a ni, ka pawmpui ve lo," a ti. A hma pawhin Israel-in Gaza a bomb chu ngaihtuahna fim tak nei loa ti leh, Israel sipaite chu che na lutukah a lo puh tawh bawk.

White House chuan kar liam ta khan Biden hian Netanyahu hi biain, US-in Gaza-a beihpui a thlak mekah civil mite leh chhawmdawl hna thawktute himna turin hma a la ṭha tawk lo a nih chuan, US-in Israel a puihna ṭhinah intiamkamna siamah a lo vau tawh bawk niin a tarlang.

Gaza Strip-a beihpui a thlak chungchangah ram hrang hrangte chuan Israel chu indo titawp leh, inkahhai puang turin an nawr reng a ni. US ram chhungah pawh anti-war activist bakah Muslim leh Arab-American-te chuan Gaza-a inkahhai puan a nih theihna atan leh, US-in Israel sipai a puihna ṭhin titawp tura hma la turin President Biden pawh an nawr fo a ni.

Israel hian Indopui II hnu aṭang khan ram dang zawng aiin US puihna leh chhawmdawlna hi an dawng hnem zawk a ni. Kum 2022-a Russia-in Ukraine a rûn hnuah, US-in Ukraine sipaite puihna tur hmanrua leh ralthuamte a thawn nasat tak avangin, kum hnih chhung chu Israel sipaite puihna a pek ṭhin pawh a tihtlem phah tawh a ni.

Israel-in puan in 40,000 a lei tawh

Ram hrang hrangte'n ti lo tura an nawr mek chungin, Israel chuan Gaza Strip chhim lam, Rafah-a beihpui thlak a tumna chu kaltlangpui a la tumruh hle.

Israel defence ministry chuan Rafah-a beihpui an thlak hmain civil mite chu central Gaza, 'humanitarian islands' a tihah sawn chhuah phawt an tum tih sawiin, hemi atan hian puan in pawh 40,000 an lei tawh nia sawi a ni. Puan in pakhatah hian mi 12 zel an khawsa thei dawn a ni. Israel-Hamas indona thlen hnuah Rafah-ah hian mi tam tak tlanchhiain, tunah hian Palestinian mi maktaduai khat chuang an awm mek a ni. Rafah-ah hian Hamas battalion pali an la awm a, senior commander pawh eng maw zat an la awm niin Israel sipaite chuan an sawi.