Turkey-in Gaza-a inkahhai puan a nih loh chuan an ram thil Israel-ah thawn dawn lo

Turkey sorkar chuan Israel hnena an thil thawn ṭhin chungchangah khapna an siam tur thu sawiin, Gaza strip-ah inkahhai puan a nih hma leh chhawmdawlna thawn luh belhna tura phalna a pek hma chuan Israel-ah hian an ram thil thar/siam chhuahte thawn a nih tawh loh tur thu an sawi.

Turkish Ministry of Trade chuan hlawm 54 hnuaia an ṭhen thil chi hrang hrang, thir lam chi te, thlawhtheihna fuel te, in sakna hmanrua, khawl, cement, huan thlai enkawlna damdawi leh brick te pawh tiamin, Israel-ah hian an thawn chhunzawm tawh rih dawn lo niin a sawi. "Israel hian khawvel huapa dan kan neihte a bawhchhia a, khawvel ram dangte a zah lo bawk a ni. Israel hian inkahhai a puan hma leh Gaza-a chhawmdawlna thawn luh belh a remtih hma chuan he khapna dan hi hman chhunzawm a ni ang," tiin a tarlang.

Turkey -in hetiang ruahmanna an siam chhan nia lang chu Turkey-in Gaza-a sipai thlawhtheihna hmanga chhawmdawlna thawn luh a tum Israel-in a lo dan vang niin an sawi a, he thil thlen hnu hian Turkey hian a hma tiama hma an lak ve tur thu an lo sawi tawh a ni. Turkey president, Recep Tayyip Erdogan chuan Palestine-a an unaute an thlawp reng tur thu leh, Gaza-a thisen chhuahna a tawp a, Palestine zalen rama an unaute an chen hma chuan an beih zel tur thu a sawi bawk a ni.

Israel Foreign Minister, Katz erawh chuan Turkey president, Recep Tayyip Erdogan chu Hamas-in Gaza-a tualthahna an kalpui mek a thlawp avanga an ram leh mipuite ṭhatna tur dah khamah a puh thung. Katz hian America leh ram danga Israel ṭhian ṭhate puna, Turkey hrekna tura hmalak ve an tum thu a sawi lang bawk a ni. Israel leh Turkey-te hian Israel-Hamas indo chhuah hnu lawkah an ram palaite ve ve hi an lo ko let tawh a ni.