China leh Russia ram hotute an inkawm

China President Xi Jinping leh Russia foreign minister Sergey Lavrov-te chu Thawhlehni khan an inkawm a, Lavrov chuan China-in hmasawnna kawng tluang taka an zawh mek chu lawmawm a tih thu a sawi.

Lavrov chuan Russia ṭhian ṭha China hlawhtlinna chu chhuanawm a tih thu sawiin khawvel ram dangte China ṭhanna dal tuma chet la awm ṭhin mah se, hma lam an panna chu a dal ngai chuang lo niin a sawi. Ukraine a rûn avanga khawvel ram dangte'n an hrek rawn mek Russia hian ram chhung sum leh pai dinhmun siam ṭhat nan China hi a mamawh hle a ni.

Ram pahnih foreign minister, Lavrov leh Wang Yi chuan Thawhlehni vek khan thuthar thehdarhtute kawmin, Russia dinhmun hriatthiamna awm loa khawvel ram dangte'n thutlukna an siam chu China leh Russia chuan an pawm ngai dawn lo niin an sawi. China leh Russia hi UN Security Council permanent member an nih avangin US leh a thawhpui ramte hmalakna dan kawngah an thawk dun ṭha hle a ni.