Israel beihna avangin Hamas hotuin a fate pathum a chân

Palestinian helpawl, Hamas hotupa, Ismail Haniyeh fapa pathumte chu Nilainia Israel-in airstrike an neihnaah an thi.

Haniyeh fate hi Gaza-a Al-Shati camp pana an kal laiin an chuanna car chu bomb puakin a fuh a ni. Haniyeh fapa upa ber chuan a naute thih thu hi facebook lamah a sawi chiang tawh a, ram tana nunna hlantu an nih avangin a chhuan thu a ziak lang tel bawk.

Hazem, Amir leh Mohammad bakah hian Haniyeh chuan a tûte pahnih a chân bawk niin Hamas chuan an tarlang. A fate leh tûte pahnih chantu Haniyeh chuan inbiaknain a vawrtawp a thlen ṭep tawh laia hetiang thil thleng vang hian an thil phutte chu an thlak phah dawn lo niin a sawi. "Kan hmelmate chuan ka fate an bitum avanga kan thil phutte kan thlak an ring a nih chuan an tisual hle ang. Kan dinna ngaiah kan ding reng dawn a ni. Ka fate thisen hi kan mipuite thisen aia a hlutna bik a awm lo," tiin Haniyeh chuan a sawi.

Israel-in inkahhai puanna tura rawtna an siam chu Thawhlehni khan an zir chian thu Hamas chuan an sawi a, Palestinian mite thil phût tihhlawhtlin tumna pakhat mah a awm loh avangin an pawm theih loh thu an sawi bawk. Israel-in Gaza-ah hian thla sarih chhung lei lam leh van lam aṭangin beihpui a thlak tawh a ni. Inremna kawng zawnga inbiakna neih fo ni mah se, Hamas lamin Gaza aṭanga Israel inhnukdawk tura an tih leh, an mipui raltlan mekte anmahni in lama haw kir phalsak tura an ngenna chu Israel hian a pawmpui theih loh avangin Israel leh Hamas hian inremna an la nei thei rih lo a ni.