Khawvel chhe tur ven nan kum hnih a la awm : UN climate chief

United Nations Framework Convention on Climate Change (UNFCCC) Executive Secretary, Simon Stiell chuan London-a Chatham House event hmannaah Nilaini khan thu sawiin, khawvel ram sorkar, sumdawng liante leh hmasawnna hna thawk ṭhin bank te chuan khawvel sik leh sa dinhmun chhe zel veng tura hma lak nan kum hnih hun an la neih thu a sawi.

Simon Stiell chuan ram hausa zual 20-te chu khawvel pum boruak bawlhhlawhna 80% zetah mawhphurtu an nih thu a sawi a, heng ramte hian sik leh sa dinhmun chhe zel tur veng tur hian hma an lak a ṭul thu a sawi a ni. Stiell chuan, "Greenhouse gas titlem tur hian hun kan la nei a, ram tinin sik leh sa dinhmun siam ṭha turin ruahmanna ṭha leh changkang zawk kan neih erawh a ṭul a ni," a ti. Stiell hian khawvel sik leh sa dinhmun thlira hmalakna hrang hrang tur rel ṭhin, Conference of Parties (COP) intawh khawm pawh mihring tlem zawk leh a taka hmalakna nasa zawk awm sia neih a duh thu a sawi langin, ram hrang hrang politician-te pawhin sik leh sa ngaih pawimawhna an nei nep sawt niin a sawi bawk.

Baku, Azerbaijan-a kumina UN climate negotiations neih turah hian ram rethei leh ṭhang mek te'n, khawvel sik leh sa dinhmun tichhe tlem zawnga tuialhthei kalsana hma an lakna tura an harsatna sutkian leh, sum faia ṭanpuina pek chungchang sawi a ni dawn a ni. Scientist-te chuan kum 2030-a khawvel boruak tibawlhhlawhtu nasa ber, greenhouse gas kan tihchhuah a chanvea tihhniam chu boruak lum zel tur tihtawp nana kawng pawimawh ber a nih thu an sawi a, hetih lai hian nikum khan khawvel pumin greenhouse gas a tihchhuah nasat ṭum a thleng thung a ni.