Hong Kong-ah press mite luh phal lo

Khawvel huapa press mite zalenna atana thawktu pawl, Reporters Without Borders (RSF) chuan an pawl mi pakhat chu Hong Kong-ah darkar ruk zet man leh thu zawh fiah a nih thu sawiin, Hong Kong luh phalsak a nih loh thu an tarlang.

RSF-in an tarlan danin, Taiwan-a awm, advocacy officer, Aleksandra Bielakowska chu media lama mi langsar, Jimmy Lai chungthu ngaihtuahnaa tel tura kalin, Hong Kong-ah hian luh phalsak a ni lo a, Taiwan lamah an thawn let niin an tarlang. RSF director of campaign, Rebecca Vincent chuan Hong Kong-a an pawl mi pakhat lo dawnsawn a nih dan chungchangah RSF chu an lawm loh thu sawiin, khawvel ram hrang hrangah thuneitute'n court rorelna thlithlai tura kal an lo dan an hriat vawi khatna a nih thu leh, Jimmy Lai chungchangah chuan thu dik lo awm ngeia a lan tak thu leh, Hong Kong-a press mite zalenna rahbeh a nih bakah, dan rorelna a awm tak loh thu te a sawi lang bawk a ni. Rebecca Vincent chuan Hong Kong special administrative region hnen aṭanga insawi fiahna an phut thu leh, Jimmy Lai-a thubuai ngaihtuahnaa an pawl mi an tel theih an duh thu a sawi zui.

Jimmy Lai hi democracy ṭan zawnga thuchhuah ṭhin, Apple Daily dintu a ni a, China-in kum 2020-a national security law thar a puan hnu khan ram himna atana hlauhawma ngaiin thubuai siamsak a ni ta a ni.