US President thar tur Joe Biden

November 3-a US President thar thlanna neiha result kimchang chu hriat la ni lo mah se, Democratic party presidential candidate Joe Biden chuan President tling tura electoral vote hmuh ngai zat a hmu tling tawh a, US President  ṭanglai Donald Trump hnehin President 46-na ni turin thlan tlin a ni ta. 

Joe Biden hian mipui vote maktaduai 74 chuang a hmu tawh a, US presidential candidate ni tawh zingah vote hmu hnem ber a la ni. African-American vote a hui hnem a, hei vang hian an chungah a bik takin lawmthu pawh a sawi hial. 

President atana Biden a tling tih hriatchian a nih hnuah khawpui hrang hrangah amah thlawptute chuan an lawm nghal a, Trump thlawptute pawh hmun ṭhenkhatah an pungkhawm bawk a, mahse boruak ṭha lo thleng a awm lo. 

Biden leh a vice president candidate Kamala Harris te chuan an tling tih hriatchian a nih hnuah Wilmington, Delaware-ah anmahni thlawptute hmaah thu sawiin, Biden chuan ram hruaitu atana amah ring ngam a, vote-tute chungah lawmthu a sawi a, inpumkhatna siamtu tur President nih a tum thu sawiin, red leh blue state hran awm loin, United States an ni tih a sawi. 

America mipuite tan theih­tawpa a thawh tur thu sawiin, an ram chakna lungphum, middle class-te tichak tur te, khawvelin America a zahna tur leh ram chhunga inpumkhatna ṭha a awmna turin a thawk dawn tih a sawi a, he a hmathlir neih ang hi America mi tam tak pawhin ṭawmpuiin an vote-na chhan a ni a, hei hi a taka tihpuitlin chu an  hna tur a ni tih a sawi. Bible-a engkim tan hun ruat a ni tia sawi a nih angin, America tan pawh an damna hun a thleng ta tiin Biden chuan a sawi. Democrat candidate a ni a, mahse tunah chuan America President a ni dawn tih sawiin, Biden chuan amah vote-tu leh vote lotute tan ang khat veka hna a thawh tur thu a sawi a ni. 

US President thar  atana thlan, Joe Biden hi nakkum January 20-ah lakluh a ni ang. 

President thar lakluh in­khawm hi Washington DC-ah Capitol Building-ah neih a ni dawn a, Chief Justice-in rinawmna thu a tiamtir ang. US President lakluh tharte'n thu an tiam zawhah Pathian hnena ṭanpui tura an dilna, 'So help me God' tih ṭawngkam hi official-a thutiam tur zingah telh ni loh mah se, President lakluh tharte hian an la sawi fo tho a ni. He ṭawngkam hi Abraham Lincoln khan a hmang hmasa ber nia hriat a ni. 

Lakluh a nih ni vekah President thar hian a office luah nghalin, president thuneihnate pek nghal a ni dawn a, a policy tipuitling turin hna a thawk  nghal thei dawn a ni.  

US President 46-na ni tura thlan tlin, Joseph Robinette Biden Jr hi kum 2009-2017 chhung khan vice president 47-na niin, 1972-2009 khan Delware bial Senator a ni bawk. 

Kum 1942, November 20-a piang Joe Biden hi Scranton, Pennyslvania leh New Castle County, Delaware-ah a seilian a, Syracuse University aṭangin law degree a nei. Kum 1970-ah New Cast County Councillor niin, kum 1972-a Delaware aṭanga US Senate atana thlan tlin a nih khan America chanchina Senator ni theih naupang parukna a ni pha. 

Senate-ah ṭum ruk zel thlan tlin niin, kum 2008-a Barack Obama hnuaia vice president a nih dawna a ban khan senator senior ber palina a ni pha tawh a ni. Obama president-na hnuaiaah kum 2009-2017 chhungin vice president a ni a, kum 2019 khan Obama chuan Presidential Medal of Freedom a hlan. 

Kum 2019, April thlaah an ram President thar thlanna tura Democratic party candidate chuh a tum thu a puang, kumin August thla khan 17-20 chhunga Democratic National Convention neihah khan official-in party pre­sidential candidate atan puan a ni ta a ni. 

Joe Biden hian President ṭanglai, Republican party presidential candidate Donald Trump a hneh a, vice president ni lai ni lo zingah President ṭanglai hneh thei pahnihna a ni. Kum 1968 khan Richard Nixon chuan President ṭanglai chu a lo hneh tawh a ni. 

Biden hian a nupui hmasa, kum 1972-a thi ta, Neilia Hunter nen fa pathum an nei a, kum 1977-ah tuna a nupui Jill Tracy Jacobs nen inneiin fanu pakhat an nei. 

Vice President thar tur Kamala Harris hi black leh Asian-American zingah US vice president ni thei hmasa ber leh, hmeichhia zinga he dinhmun chelh thei hmasa ber tur a ni. 

Harris chuan an hmabak chu kawng awlsam tak a ni dawn lo tih a sawi a, mahse America a inpeih a, Joe Biden nen pawh chona hmachhawn tur hian an inpeih tih a sawi. 

Kum 1964, October 20-a piang Kamala Devi Harris pa Donald Harris hi Jamaican-American niin, a nu Syamala Gopalan chu Tamil Nadu, India aṭanga US-a lut a ni thung. Kum sarih mi a nihin a nu leh pate hi a inṭhen a ni. 

Oakland, California-ah piangin, Howard University leh University of California, Hastings College of the Law aṭangin a graduate. Alameda County District Attorney office-ah hna thawk ṭanin, San Francisco District Attorney Office leh City Attorney of San Francisco office-ahte a thawk tawh bawk. Kum 2003-ah San Francisco district attorney atan thlan a ni a, 2010 leh 2014-ah California Attorney General atan thlan a ni. Kum 2016-ah Senate atan thlan niin, South Asian American zinga US Senate member ni thei hmasa ber a ni. 

Kum 2020 US President thlanna neih tura Democratic party presidential candidate nih tumin a bei ve hman a, mahse nikum December thla khan a inhnukdawk. Kumin August 11 khan Joe Biden chuan a vice presidential candidate atan a puang ta a ni. 

Kum 2014 khan a pasal, lawyer Doughlas Emhoff nen an innei a, fa an nei lo a, a pasal hian a nupui hmasa lakah fa pahnih a nei thung. 

US President ni mek Donald Trump chuan vote maktaduai 71 lai hmu mahse White House a chhuahsan a ngai dawn ta. 

President Trump-a hi election result-ah a lungawi thei lo a, Twitter lamah ṭuanin nasa takin vote chhiar dan a sawisel. An observer-te chu counting room-ah luh ve an phalsak lo nia sawiin chutiang thil chu tunhmain a la thleng ngai lo ni te'n a sawi a, an ram huna Inrinni chawhma lamah Twitter-a duhtawka election fraud chungchang a anpui hnuah  White House aṭanga km 40 vela hlaa awm Trump National lamah golf khel turin a kal a ni.

Trump hian election fraud chungchangah hian finfiahna engmah a nei lo a, a chak lo tih hriat a nih hnu khan vantlang hmaah engmah a la sawi lo thung. Trump ṭan tute chuan hmun hrang hrangah voter fraud chungchang aupuiin kawngte an zawh bawk. Hetiang hi ni mah se Trump thlawptute zawng zawngin inthlan tihchingpen an ring vek tihna a ni lo.

Trump hian one-term president club a zawm ve a ngai dawn ta a,  George HW Bush hnua term hnih chelh zo lo hmasa ber a ni dawn ta.