US-in Israel-a a hnathawkte zin chhuah a khap

United States (US) chuan Iran-in Israel a beih mai a hlauhthawn avangin Israel rama a hnathawkte chu zin chhuah a khap.

US embassy chuan an staff-te chu fimkhur thilah Jerusalem, Tel Aviv leh Beersheeba area pawn lamah zin chhuak lo turin a ti.

Iran hian kar liam taa Syria-a an consulate beihna leh, mi 13 an thih phahna chu Israel thiltih niin a puh a, phuba lak a tiam a ni. Mahse Israel chuan he thil hi a tih a nih thu engmah a sawi lo a, mahse, tam tak chuan inhnamhnawihna a neih ngei an ring thung. Consulate beihnaa thi zingah hian Iran elite Quds Force-a senior commander pawh a tel a ni.

Israel prime minister Benjamin Netanyahu chuan a kaihhruai sorkar chu eng ang beihna pawh hmachhawn turin a inpeih reng tih a sawi a, Israel tinatu chu an tina let ve zel dawn tih a sawi.

Israel leh Hamas indona thleng mek karah, Iran a lo inrawlh a, buaina a punlun zel lohna turin ram dangte chuan hma an la mek a ni. Middle East-a US operation hotu, commander Erik Kurilla pawh official-te be turin Israel-ah a zin a, UK foreign secretary Lord Cameron pawhin Iran foreign minister biain, boruak ṭha lo siam lo turin a ngen. US secretary of state Antony Blinken pawhin China, Saudi Arabia leh Turkey foreign minister-te a be bawk a, buaina siam belh chu tu mahin an duh loh thute a sawipui.

Iran hian Israel nena indo mek, Palestinian firfiak pawl Hamas hi a thlawp a, hei bakah Israel dotu langsar tak, Lebanon-a helpawl Hezbollah pawh a thlawp bawk a ni. Israel laka phuba lak a tum thu a sawi hi direct-in a bei dawn nge, a thurualpui pawlte hmang hian a che dawn tih erawh sawi a la nei lo. Iran official-te chuan Israel embassy-te chu an him lo tiin, consulate building chu an target a nih mai theih tute an lo sawi lang thung.

Israel defence minister, Yoav Gallant chuan US hnenah, Iran-in Israel ram chin a bei a nih chuan an phu ang chhanna an hmu ngei ang tiin a hrilh ve bawk.