Myanmar aṭanga Thailand-a tlanchhia an pung

Myanmar sipai sorkar dodaltu helpawlin Thailand ramri-a khaw pawimawh, Myawaddy an lak hnuah, inbeihna a awm chhunzawm zel hlauthawngin Thailand lama tlanchhia an pung zel.

Karen National Union (KNU) chuan Ningani khan sipaite kut aṭangin Myawaddy khua hi an la a, hemi hnu hian sipai 200 vel chu inhnukdawkin Thailand lamah an tlanchhia a ni. Mahse Myanmar sipaite hian air force-te nen he khua hi lak let leh tuma an beih leh hlauhthawnna a nasa hle a, hei vang hian khaw chhung mi tam tak chu ramri leh lam, Thailand-a Moe Sot khaw lamah hian a tlanchhia a ni.

Myanmar sipai sorkar thupuangtu, Zaw Min Tun chuan an sipai ṭhenkhatte an chhungte himna ngaihtuah avanga inhnukdawkin Thailand kutah an inpe tih a sawi a, heng sipaite hi hruai haw an nih theihna turin Thailand sorkar nen pawh an inbiak mek thu a sawi.

Thailand foreign minister Parnpree Bahiddha-Nukara chuan nimin khan Moe Sot leh Myawaddy inkalpawhna lei, ram pahnihte insumdawn tawnna kawnga hmun pawimawh tak chu a tlawh. Myanmar tualchhung buaina avanga an rama tlanchhe lut an pun zel chungchang pawh an ennawn dawn tih a sawi bawk. Kar tir lam khan Thailand chuan Myanmar aṭanga tlanchhia hi mi nuai 1 chin chauh an lo dawngsawng thei dawn niin a sawi a ni.