Mali sipai sorkarin politics kaihhnawih tihchhuah a khap

Mali sipai sorkar chuan an ram media-te chu political party leh association-te thiltih reng reng tihchhuah a khapsak.

He thupek hi high authority for communication chuan social media-ah a tichhuak a ni. Khapna thupek hian media form hrang hrang - television, radio, online leh print newspaper-te a huam vek a ni.

Kum 2020 hnuah Mali-ah hian sipai chakna hmangin ṭum hnih sorkar paihthlak a ni hman tawh a, tualchhung buaina an nei reng a ni. Politics lama an buaina bakah, firfiak pawl al-Qaida leh Islamic State group hnuaia helpawl hrang hrangte an hrang hle bawk.

Sipai sorkar thuchhuah hi journalist organisation, Maison de le Press, or Press House chuan na taka sawiselin, an pawm loh thu an sawi nghal a, jounalist-te chu politics kaihhnawih hrang hrang report chhunzawm zel turin an hriattir. National commission for human rights pawhin sawiselin, sipai sorkar thutlukna siam chuan thil pawi tak a thlen thei a ni, an ti. "Tualchhung boruak siam ṭhat tum aia, mimalin dikna leh zalenna a neihte khapsak tumna hian buaina a siam thei zawk a, hei hi kan ramin a mamawh loh tak a ni," an ti.

Media-te khapna thupek a tihchhuah hma ni hian sorkar chuan political party-te khapna a lo siam tawh bawk a, thupek awm leh hma chuan political party anga eng thil mah a tih a phalsak lo a ni.