US, Japan leh SKorea sipaite'n joint drill nei

U.S, Japan leh Philippines hotute'n Washington lamah inkawmna hun an hman mek laiin US, Japan leh South Korea sipaite chuan East China Sea-ah ni thum chung awh turin intuaihriamna hun an hmang ve mek bawk.

Ram pathum sipaite hian thawhhona ṭha an neih theih nan hetiang hun hmang hi an ni a, hemi bakah hian China inluling lutuk tur venna atana tih a ni tel bawk. Military drill hi Nilaini aṭanga neih ṭan niin nimin khan an zo a, ram pathumte hian an ralthuam neihte enchhin nan an hmang nghal a ni. Rear Adm. Christopher Alexander chuan US, Japan leh SKorea chuan tuipui chhung lamah pawh military exercise hi an nei tawh niin a sawi a, US leh a ṭhian ṭhate inpawh zel nan hetiang intuaihriamna hun neih hi a pawimawh niin a sawi bawk.

China hian tun hnaiah tuipui lama a ramchin nia chhal thar a nei tam hle a, a ram ṭhenawm; SKorea leh Japan mai bakah ASEAN ram hrang hrangte nen tuipui ramriah buaina an ngah hle. US chuan tuipui lama remna leh muanna a awm theih nan theihtawpin hma a la a, China lian zel tur dal nan leh ram tenau zawk laka an inluling lutuk tur ven nan China hnaih tuipuiah US ṭhian ṭhate nen hma an la ṭhin a ni.