Iran-in drone leh missile hmangin Israel a bei

Iran leh Israel inkar buaina chuan zual lam a pan zel a, Inrinni liam ta khan Iran chuan drone leh missile hmangin Israel a bei a, mahse, a drone kah chhuah zinga a vai deuthaw, 99% vel chu an lo dang thei tih Israel lam chuan an sawi.

Tun hnaia Syria-a Iran consulate beih a nih chungchangah Iran chuan Israel hi mawhphurtuah a puh a ni. Consulate beihnaa thi zingah hian Iran general pahnih an tel. He thil thleng avang hian Iran chuan Israel hi a vau zui a, phuba lak ngei a tum thu sawiin, Inrinni khan a bei zui ta a ni.

Iran state media, IRNA chuan an ram sipai ṭha bik, Revolutionary Guard chuan drone leh missile 300 chuang hmangin Israel hi an bei tih a tarlang.

Israel Defence Force (IDF) thupuangtu, Rear Admiral Hagari chuan Israel ralthuam kah chhuah zinga 99% chu an lo dang thei tih sawiin, drone 170 leh cruise missile 30 chu Israel ram an thlen hmain an kap thla a, ballistic missile ṭhenkhat erawh an tlang a, hei vang hian mi 12-in hliam an tuar phah niin a sawi.

Iran-in a beih hma hian Israel chuan an ramah school chawlh a puang a, vantlang hmunah mi 1,000 aia tam pung khawm lo turin thuchhuah a lo siam tawh bawk. Hagari chuan Israel chu inveng tur emaw, a beitu zawkah emaw ṭang turin a inpeih reng tih a sawi a, US leh a thawhpui ram dangte chuan a thlawp tlat thu a sawi bawk. Israel air defence chu a rintlak thu a sawi a, hemi rual hian 100% -a a venhim theih bik loh avangin mipuite chu sorkar thuchhuah ngai pawimawh turin a chah bawk. Israel hian Iran missile kap thla turin a ṭhian ṭha US puihna a dawng nia hriat a ni.

US, Canada leh United Nations chuan Iran-in Israel a bei chu an dem tak zet tih an sawi. US President, Joe Biden chuan a ṭhian ṭha Israel lamah an ṭang tlat dawn tih sawiin, G-7 ramte inhmu khawm turin an inbuatsaih niin a sawi. Hetah hian Iran an chhan let dan tur an rel dawn ni a hriat a ni.