Asia ram zinga khawsak hautak berna Pakistan

Asian Development Bank (ADB) report tihchhuaha tarlan a nih danin Pakistan chu Asia ram zinga khawsak hautak berna hmun a ni a, thil man sanna hi 25% zet ni tawhin, an ram economy ṭhanna pawh a muang ber pawl niin, 1.9% chauha ṭhangin, Myanmar, Azerbaijan leh Nauru dawtah an awm a ni.

ADB hian Asian Development Outlook an tihchhuahah hian kum lo awm turah pawh Pakistan dinhmun hi a ṭhat loh thu an tarlang a, fiscal year hman leh turah pawh thil man sanna hi 15% a la ni pha dawn a, hei hi Asia ram 46 zinga a sang ber a ni. Ram pum ṭhanna pawh 2.8% vela chhut niin, hei hi Fiscal Year 2024-2025 chhunga a hniam ber pangana a ni. State Bank of Pakistan (SBP) leh Pakistan sorkar chuan fiscal year hman mekah thil man sanna chu 21% ni turin an chhut thung.

Pakistan dinhmun hi stagflation (ram economy ṭhang muang leh thil man sang chak)-ah a awm mek niin World Bank chuan kar hmasa khan an lo sawi tawh a, mi nuai 10 chuang chu rethei huangah an luh belh thei dawn niin an tarlang bawk. Pakistan-ah hian mi rethei an tih hi mi nuai 98 vel an awm mek anga chhut a ni. Pakistan hi tun dinhmunah Asia rama khawsak hautakna ber a ni ta a, hemi hma hian South Asia-a khawsak hautak berna ram a lo ni tawh bawk a ni.