Niger aṭanga US sipaite chhuah phûtin an nuar

Niger khawpui Niamey-ah Inrinni khan an ram aṭanga US sipaite chhuah phûtin nawrh huaihawt a ni a, mipui ṭhahnem tak chuan kut suih leh Niger flag keng chungin kawng an zawh a ni.

Inrinni-a Niger-a mipuiin US sipaite'n an ram an chhuahsan phûta an nawrhna ang hian nikum khan French sipaite an ram aṭanga chhuak turin an lo nawr tawh bawk a ni. Niger-ah hian sorkar paihthla a, sipai sorkar din a nih hnuah US nena military accord an neihte titawpin, Russia sipaite an la lut a ni. US sipaite an ram aṭanga chhuak tura nawrhnaah hian pung khawmte hian an rama sipai sorkar an thlawpna an lantir a,"America thil reng reng kan duh lohna kan lantir a, kan ram leilungah hian American kan duh lo," tiin pung khawmte chuan America rorelna duh lohna leh mipuite zalenna chu an kawng zawhah hian a innghat a ni tih an sawi bawk. Niger-ah hian US sipai 650 vel an awm mek a, Niger khawpui pakhat, Agadez-ah thlawhtheihna ṭumhmun an nei bawk.

Nikum July thlaa an ram democracy rorelna hnuaia President Mohamed Bazoum sorkar paihthla a, sipaiin sorkarna an siam hma khan Niger sorkar hian French leh US sipaite chu inremna ziahpuiin, ram pahnihte sipai hian West Africa Sahel biala helna chhuak ṭhin ven nan hna an thawk a ni. March thla khan Niger sipai sorkar hian an ram ṭhenawm, Mali leh Burkina Faso hnung zuiin, khawthlang ramte nena sipai inremna an neihte titawpin, an bial chhunga ECOWAS thlengin an bansan a, hetih lai hian Russia nena inzawmna ṭha zawk nei turin hma an la thung a ni.