Baghdad-ah emergency puang

Iraq khawpui, Baghdad-ah kar kalta Inrinni khan eptu pawl lung≠awi loten Parliament leh building pawimawh awmna, Green Zone luhkhunga buaina an siam avangin emergeny puan a ni.

Eptu pawlte hian an ram sorkar inrelbawl dan siamṭhat phutin nawrh an huaihawt a, parliament building chhungah lutin an ram puanzar te khawihin, ṭhutthlengte an tichhia. Building chhunga roreltu awm ṭhenkhatte chu flag chuan an vua a, ṭhenkhatah chu room chhungah te biruk a ngai hial a ni. Pawn lam car awmte chu eptute hian an tichhe bawk a ni.

Baghdad Operations Command chuan buaina a chhuah hnu hian khawpui kalpawhna kawngpui≠te khar vek a nih thu a sawi.

Eptute hian hun eng emaw chen nawrh an lo huaihawt tawh a, mipuite nawrna a nasat avangin Prime Minister Haider al-Abadi chuan a cabinet siksawi a tum a, mahse hei hi Shiite hotu Muqtada al-Sadr chuan na takin a sawisel. Cabinet siksawi a tum hi parliament member ṭhenkhatten an duh lo bawk a, hei vang hian rorel inkhawma nasa taka in au buaiin, bur-a an invawm bakah, kut hial pawh an inthlak a ni.

Baghdad khawpuia nawrh huaihawtte hian political quota system hman mek chu tihtawp an phut. He system hi kum 2003-a US kaihhruai ṭangrual ramten Iraq an run hnua hman a ni a, hnam hrang hrangte quota siamsak an ni. Kur≠dish lawmaker, Shwan al-Dawoodi chuan an buainaa mawhphurtu ber chu America a nih thu sawiin, an buaina siam chingfel loin Iraq ram an chhuahsan a ni, a ti.

Inrinni kha PM-in a cabinet siksawite a puanchhuah huntur ani a, mahse session-ah hian member kal an ṭha lo hle. Mipui nawrh huaihawtten an tihbuai zui tak avangin session pawh tihtawp a ni ta a ni.

Nawrh huaihawttute chuan parliament-ah chuan boruak ṭha tak hnuaiah sit-in protest neih chhunzawm zel an tum a, hemi rual hian mipui pungkhawmte chu roreltute bei lo tur leh, bungrua tichhe zawnga che lo turin an ngen.