Kenya ramah sai ngho ton 105 hal ral

Kenya ramah sapel rute kut aṭanga an man, sai ngho ton 105 leh samak ki, ton 1.3 chu kar kalta Inrinni khan President Uhuru Kenyatta kaihhruaiin hal ral a ni. Hemi rual hian sapel ru ṭhinte lakah indo an puang nghal bawk.

Kenya ramah hian African ramten Elephant summit an hmang a, Africa rama sai awmte an ral chak lutuk chungchang ngaihtuahin, humhalh an nih dan turte an ngaihtuah a ni.

President Kenyatta chuan sai ngho tam tham tak an halral chuan an ramin sapeltute nuaibo tuma an inpekna a lantir a ni tih sawiin, "Kum sawm kalta chhung khan Africa sai tam tham kan chan a, hei hian kan ram leh khawthlang dinhmun thlengin nghawng ṭha lo tak a nei a ni" a ti. Inrinni-a sai ngho leh samak ki an halral hi US dollar maktaduai 500 hu vel nia chhut a ni.

Kenyatta chuan sapel ru ṭhinte hremna tur dan khauh tak an siam dawn tih a sawi a, September thlaa South Africa-a CITES meeting neih hunah sai ngho hmanga sumdawnna chu khapna dan siam tura an nawr tur thu a sawi bawk.

Gabon President Ali Bongo chuan Kenya ram thiltih dan chu fakin, Africa ram dangte pawhin ramsate humhalh tura na zawka hma an lak a ngai a ni, a ti. Sai humhalh an nih theihna turin sai ngho leh samak khi hmanga sumdawnna chu tihtawp a ngai a ni, a ti.