Iraq-a nawrh huaihawtten Green Zone chhuahsan

Iraq rama mipui lungawi loten kar kalta Inrinni khan an ram parliament an luhkhung hnuah building pawimawh tak tak awmna hmun, Green Zone-ah sit-in protest an huaihawt zui a, mahse nimin khan Greene Zone hi an chhuahsan.

Nawrh huaihawtute chuan nimin khan aurinna hmangin, Green Zone-a awmte chu nawrh tihtawp turin an hriattir a ni.

Hemi hma hian Prime Minister Haider al-Abadi chuan Inrinni-a parliament building luhkhung a, bungrua ṭhenkhat tihchhettute chu man turin thupek a lo tichhuak tawh bawk. PM hian nimin khan nawrh huaihawtten parliament building-a thil an tihchhiatte hi a hmunah kalin a enfiah a ni.

Nawrh huaihawt zinga a tam ber hi Shia hotu, Moqtada Sadr thlawptute an ni a, PM-in a cabinet a siksawi tur a tikhawtlai zel an duh loh avangin lungawi lohna hi an lantir a ni. Sorkar chu an ram mamawh ngaihsak tawk loah an puh a ni. Hetihlai hian cabinet member zingah PM-in member siksawi a tum hi duh lo eng emaw zat an awm bawk. Shia political party zingah hian cabinet siksawi tum chungchangah inrem lohna lian tak a awm a, Shia politician hlun, Prime Minister hlui Nouri Maliki leh midang ṭhenkhat chuan sakhaw hruaitu aṭanga politician-a inlet, Moqtada Sadr hi an mil lo hle a ni. Hetihlai hian Shia Iraqi tam zawk chuan Sadr hi an thil phut tihhlawhtlinpui theituah an ngai thung.

Shia sakhaw hotu, Moqtada Sadr lakah hian kum 2004-a sakhaw dang hotu thah chungchanga inhnamhnawiha puhin manna tur thupek tihchhuah a ni tawh a, a pawlte chu kum 2006 leh 2007 a Sunnis mi tam tak nghaisak leh thahnaa inhnamhnawihah puh an ni bawk. He thil thlen lai hian Sadr hi Iran ramah a tlanchhia a, kum 2011 khan Iraq-ah kir lehin, politics a khelh zui ta a ni.

Iraq rama Shia pawl inkara buaina a chhuah chuan an ramchhung inrelbawlna thlengin a nghawng buai a hlauhawm hle. Islamic State (IS) firfiak pawl nena an indo mek lai a nih avangin hemi thleng hian a nghawng hlauhthawnna a lian hle a ni.

Nawrh huaihawtte inkulhna, Green Zone hi square km 10 biala zau a ni a, sorkar building pawimawh leh foreign embassy-te awmna hmun a ni.