Paris-a May Day hmannaah buaina chhuak

France khawpui, Paris-ah May 1 khan sorkarin labor law siamṭhat a tumna duhlohna lantirin mi tam takin kawng an zawh a, kawngzawhte leh riot police-te inkarah buaina a chhuak.

Paris-a kawng zawhnaah hian mi 16,000 - 17,000 vel an tel niin police-te chuan an sawi a,mahse kawngzawh huaihawttu French union CGT erawh chuan mi 70,000 vel niin a sawi thung. Mipui pungkhawmte chuan labor law siamṭhat tumna chu sut turin sorkar an phut.

France trade union leh pawl dangte chuan kum tinin Labor Day-ahhian hnathawktute dikna chanvo humhalh leh an thil phutte tarlanna atan kawngzawh hi an huaihawt ṭhin. Kuminah hian sorkarin labor law siamṭhat a tuna, Labor Minister Myriam El Khomri hming chawia El Khomri law tia mipuiten an sawi chu an duh lohna a lantir an ni. He dan siamṭhat rawtnaah hian company-te chu labor market regulation-te thlahdul tura tih an ni a, mahse hei hi hnathawktu lam chuan duh loin, hnathawktute dikna chanvo a tihderthawn bakah naupang zawkte tan hna hmuh a har phah dawn niin an sawi.

Pathianni-a kawngzawhte hi hnawhdarh tumin police-te chuan tear gas te an hmang a ni.