Brazil President thlawptuten kawng an zawh

Brazil President Dilma Rousseff-i thlawptuten Pathianni khan an ram khawpui lian hrang hrangah kawng an zawh.

Kawngzawh hi state 27 zinga 16-ah, Central Union of Workers (CUT) leh labor pawl hrang hrangte huaihawta neih a ni. Sao Paulo-ah chuan mipui pungkhawm an tam ber a, kawngzawhnaa tel hi mi nuai khat an tlin niin organizer-te chuan an sawi.

President Rousseff-i hi Sao Paulo-a kawngzawhnaah a inlan a, a rual hian Sao Paulo mayor Fernando Haddad leh Workers' Party president Rui Falcao-te pawh an tel. Rousseff-i chuan thu sawiin, a policy thar te a puang a, flagship program, Bolsa Familia program pawh 9% a tihpun a nih tur thu a sawi.

Bolsa Familia program hnuaiah hian mi rethei chhungkaw hnenah ṭanpuina sum pek ṭhin a ni a, a bikin nu, an fate school-a kal lai, dan bawhchhiatna nei lote hnenah ṭanpuina pek ṭhin an ni. He program hi President hlui, Lula term laia kalpui ṭana ni a, mi rethei zawkte zinga an party, Workers' Party lar phahna ber nia ngaih a ni.

Rousseff-i chuan Mi Casa, Mi Vida (My Home, My Life) program hnuaiah mi retheite tan in 25,000 sak belh a ni dawn tih a sawi a, hei bakah hian Mas Medicos (More Doctors) program hnuaiah foreign doctor-te contract tihnun thar leh te, public official-te tan paternity leave tihsei te, hnathawktute remchan dan ang zawka rental tax pek dan tur siamremte a tum tih a sawi.