Israel-in a theih dan zawng zawnga Iran hrek phût
Iran-in drone leh missile hmanga Israel a beih chungchangah, Pathianni khan United Nations Security Council (UNSC) chuan emergency meeting a nei nghal a, meeting-ah hian Iran leh Israel palaite chu na taka inchhangin, Israel chuan Iran chu a theih dan zawng zawnga hrek a phût.
UN-a Israel ambassador, Gilad Erdan chuan Iran inthupna chu hlih a ni ta tiin, 'Khawvela firfiakte thlawptu number one, Iran chuan a nihna dik tak a rawn tilang ta a, middle east leh khawvel pum boruak a tichhia a ni,' a ti. UN body chu Iran chunga action la ngei tura a phût thu a sawi a, Iran Revolutionary Guard chu firfiak pawla puang tur leh, a tlai hma ngeia Iran laka hrek theihna zawng zawngte lek kawh turin a phût bawk.
Hetih lai hian Iran UN ambassdor, Amir Saied Iravani chuan an ram chuan mahni invenna tura dikna a neih ve thu a sawi a, Security Council chu khawvela boruak muanawm leh himna kengkawh tura a mawhphurna hlen zo loah a puh. Hei vang hian Iran chuan thlan tur dang a nei lo a, indo chawh chhuah chu an tum a ni lo tih a sawi rualin, an ram beih a nih chuan an chhan let zel tur thu a sawi.
Iran-in warning a pe tih a sawi US-in pawm lo
Iran chuan kar liam ta Inrinnia Israel a beih hma khan a ṭhenawm ramte leh US chu warning a pe tih a sawi a, mahse, hei hi US chuan thu dik lo a nih thu a sawi. US official-te chuan Iran hian engmah a hriattir lawk lo tih an tarlang.
US senior official chuan Iran Foreign Minister Hossein Amirabdollahian-a'n warning an pe vek nia a sawi chu chhangin, "Hei hi a dik lo. Notice engmah an pe lawk lo a, an target tur pawh an sawi lo," a ti. Israel a beih hnuah Iran hian US chu a hriattir chauh niin a sawi. Hetih lai hian Iraq, Turkey leh Jordan official-te chuan Iran hian Israel a beih tum chungchangah warning hi an pe tih an sawi thung.
Israel-in Iran a beih letnaah US a tel dawn lo
US president Joe Biden chuan Iran leh Israel buaina neih mek chungchangah US chuan Israel a thlawp tlat thu a sawi a, hemi rual hian Israel sipaite'n Iran an beih letnaah US chu a tel ve dawn lo tih Israel prime minister Benjamin Netanyahu a hrilh.
Biden chuan Israel-in a ram venghim tur leh, an ram beitute tudawl turin theihna a nei a ni tih a sawi a, White House national security thupuangtu John Kirby pawhin US chuan Israel-in a ram venghim tura hma a laknaah a thlawp zel dawn tih a sawi bawk. Mahse Iran nena indo erawh an tum lo tih a sawi a ni. President Biden chuan Israel-in Iran beihna a chhan let dan tur chungchang chu fimkhur taka ngaihtuah turin Netanyahu hi a chah bawk.
Iran-in a nihna dik tak a lantir : UK Foreign Secretary
UK Foreign secretary David Cameron chuan Iran chuan Israel a beih chungchangah a nihna dik tak a lantir a ni tiin, a beihna a hlawhchham chu tlawmna thuah hnih a ni,a ti zui bawk.
Cameron chuan Iran beihna chhan let dan tur a ngaihtuahnaah, Israel chu ngaihtuahna fim tak pu tur leh, chhel taka awm turin a chah. UNSC meeting neihnaah, UN secretary general Antonio Guterres-a'n ram hrang hrangte chu he buaina laka inhnamhnawih lo tura ngenin, Middle East mipuite chu dinhmun hlauhthawnawm taka an awm mek thu a sawi hnuah he thu hi Cameron hian a rawn sawi a ni.
Israel-in a beih let hun tur a la sawi lo
Israel war cabinet minister Benny Gantz chuan Iran beihna chu a hun taka an chhan let ngei tur thu a sawi a, an beih let hun tur erawh a sawi lo.
Iran-in a beih avanga Pathianni zana war cabinet meeting neih hmaa thu a sawiah, Gantz chuan a hun takah Iran chu an chhang let ngei dawn a, drone leh missile hmanga Israel a beihna man chu an teltir ngei dawn tih a sawi. Iran beih let chungchangah hian minister-te duh dan a inang chiah lo a, member ṭhenkhatin na taka chhan let nghal an duh a, mahse, Gantz leh defence minister Yoav Gallant-te chuan ram dangte thawhpuia siam phawt an duh a ni.
Hetih lai hian national security minister Itamar Ben Gvir chuan Iran beih let nghal a duh thu thuchhuah eng emaw zat a siam hman a, hetianga an che chhunzawm zel tur dang tur chuan chet ve buan buan mai a ṭul tih a sawi. Finance minister Bezalel Smotrich pawhin an ngawihsan mai chuan anmahni leh an fate thlengin dinhmun hlauhawmah an indah zawk tih a sawi. Hei bakah Israel sipaite chu Gaza-a Rafah khua chu la a, Gaza Strip pumpui chu Israel thununna hnuaiah dah a ṭul thu pawh a lo sawi tawh bawk.