New York courthouse-in Trump-a chungthu ngaihtuah ṭan

US president hlui leh inthlan lo awm leh tura Republican presidential candidate, Donald Trump chu New York courthouse-ah nimin khan thil sual tih thup nana thamna pek thubuaiah a chungthu ngaihtuah a ni.

Donald Trump hi US president hlui zinga thil tihsual thubuai neia a chungthu ngaihtuah hmasak ber a ni a, New York Courthouse hian thiam loh a chantir a nih chuan kum li zet tan inah dah theih a ni dawn a ni. Trump erawh chuan puh a nihna, 2016 inthlan hmaa puitling film chang ṭhin, Stormy Daniels ka hup nana pawisa pek chungchangah hian thiam lohna a neih loh thu a sawi tawh thung.

Trump-a thubuai chungchangah hian nimin khan jury din a ni a, thubuai ngaihtuah chhung hi kar ruk aṭanga kar riat vel zet awh tura ngaih a ni. He thubuai hi Trump-a tana thawk ṭhin, Michael Cohen-a'n Donald Trump chu Stormy Daniels nena inkawp ṭhin leh, inthlan hmaa Stormy Daniels ka hup nana USD 130,000 zet Trump-a'n a pektir nia a sawi avanga chhui zui a ni. Hetianga mi ka hup nana pawisa inpek hi dan kalh a ni hran lo a, mahse, Manhattan District Attorney Office chuan Trump hian Cohen hnena a hnathawh man a pekna pawisa record mumal lo tak avangin, sumdawnna kaihhnawiha sum tihchingpenna thil sual 34 zet neiah a puh a ni.